شہر بر آب - سفرنامہ وینس

گوگل فلائٹس پر گھومتے پھرتے وَینِس کی فلائٹ پر نظر پڑی۔ وینس کا نام پڑھتے ہی نہروں اور ان میں تیرتے خوبصورت گنڈولا کی تصویریں ذہن میں گھومنے لگیں۔ سوچا کہ اس نادر شہر کی سیاحت تو ضروری ہے۔ گوگل فلائٹس پر تفصیل دیکھنے پر پتہ چلا کہ بجٹ ائر لائن پر ٹکٹس بھی خاصی مناسب قیمت پر دستیاب ہیں۔ بر سبیلِ تذکرہ یہ بھی سن لیں کہ بجٹ ائرلائن کیا ہوتی ہے۔ یہ ائرلائنز چھوٹے فاصلوں کے لئے چھوٹے اور نسبتاً غیر آرام دہ جہازوں پر سستے ترین نرخ پر فلائٹس چلاتی ہیں۔ لیکن منافع کمانے کے لئے دوسرے طریقے اختیار کرتی ہیں۔ مثلاً مفت سامان ساتھ لے جانے کی کوئی سہولت نہیں ہوتی۔ اگر جہاز پر کھانا کھائیں تو خرید کر کھانا پڑتا ہے۔ اور نشستیں بالکل کراچی کی مشہورِ زمانہ ویگن W11 جتنی چھوٹی۔ لیکن ان سب باتوں کے باوجود بھی یہ ائرلائنز اس لئے کامیاب ہیں کہ ان کے کرائے اکثر اوقات بس کے کرائے سے بھی کم ہوتے ہیں۔ کئی دفعہ درونِ ملک بس کا کرایہ زیادہ ہوتا ہے اور بجٹ ائرلائنز سے بیرونِ ملک جانے کا کرایہ کم۔

بہرحال سستے کرائے دیکھ کر سوچا کہ ایک دو دن کے لئے تاریخی شہر وینس کی سیر کئے لیتے ہیں۔ فٹافٹ دو ائر ٹکٹس بک کروائے۔ ہوٹل بک کیا۔ برطانوی شہری ہونے کی وجہ سے ویزے کی ضرورت نہیں تھی۔ لہٰذا اس جھنجٹ سے بچت ہو گئی۔

وینس جانے میں ابھی کئی دن تھے۔ سوچا کہ اس خوبصورت شہر کے بارے میں کچھ معلومات جمع کر لی جائیں تاکہ جب وہاں جائیں تو وہاں کی تاریخ کے بارے میں کچھ علم ہو اور ان مقامات سے بھرپور لطف اندوز ہوا جائے۔ فی زمانہ کسی بھی علاقے کی تاریخ یا جغرافیہ جاننے کے لئے یو ٹیوب سے بہتر کوئی ذریعہ نہیں۔ سو ہم نے بھی یو ٹیوب کی مدد سے بہت سی معلومات حاصل کیں جن میں سے کچھ کا ذکر یہاں بھی کریں گے۔

وینس عزمِ انسانی کی نادر مثال ہے۔ اٹلی کے شمال میں ایک چھوٹا سا شہر جس کی تاریخ الف لیلۃ کی داستان سے کم نہیں۔ ایک شہر، جس کا آغاز دربدَری کی الم ناک داستان سے ہوتا ہے، بعد میں تاریخ کی امیر ترین ریاست کے طور پر سامنے آتا ہے۔ گو کہ اب یہ شہر اپنی آب و تاب کھو رہا ہے اور سمندر بُرد ہو کر معدومی کے خطرے سے دوچار ہے۔ لیکن آج بھی اس شہر کی سینکڑوں سالہ پرانی عمارتوں میں ہزاروں کہانیاں پنہاں ہیں۔ شہر میں کتنے ہی ایسے علاقے ہیں جو وقت کو صدیوں پیچھے پھیر کر مسافر کو تاریخ کے پرستان میں لے جاتے ہیں۔ وینس دنیا کے منفرد ترین شہروں میں سے ایک ہے۔ ایسا شہر جہاں زندگی سڑکوں پہ نہیں نہروں پر رواں دواں ہے۔ اس شہر کا نام سنتے ہی ذہن میں دو چیزیں آتی ہیں نہریں اور ان میں تیرتے خوبصورت گنڈولا۔ لیکن میرے خیال میں سیاحوں کی یادوں میں اس کے تاریخی اور خوبصورت پُل زیادہ دیر تک جگمگاتے رہتے ہیں۔ یہاں تقریباً ہر قابل ذکر گلی میں ایک نہر ہے اور پستہ قد پُل ( پُلیا ) ان گلیوں کو آپس میں جوڑتے ہیں۔ دن رات ان پُلوں کے نیچے سے چھوٹی کشتیاں اور گنڈولا گذرتے رہتے ہیں ۔ جب پستہ قد پلوں کے نیچے سے گنڈولا کے ملاح جھک کر اپنا سر بچاتے ہیں تو ایسا لگتا ہے کہ پل کو سلامی دے رہے ہوں۔

اب یہ شہر بقیہ اٹلی سے ایک طویل سمندری پُل کے ذریعے منسلک ہے جس پر ریل، بس، اور نجی کاریں چلتی ہیں۔ لیکن یہ تمام سواریاں وینس کے مغربی کنارے سے آگے نہیں جا سکتی۔ بقیہ شہر میں آج بھی یا تو پیدل یاترا کرنی پڑتی ہے یا کشتیوں پر ہی سفر کیا جا سکتا ہے۔ وینس میں بس یا ٹیکسی نہیں ہوتیں بلکہ وہاں آبی بس یا آبی ٹیکسیاں چلتی ہیں جو کہ مختلف طرح کی کشتیاں ہی ہوتی ہیں۔

سفر سے پہلے ایک اہم مرحلہ تھا سامان کی پیکنگ۔ لیکن کہنا پڑے گا کہ زندگی میں کسی غیر ملکی سفر کے لئے اس سے آسان پیکنگ کبھی بھی نہیں کی۔ اس کی دو وجوہات تھیں۔ ایک تو یہ کہ سفر ہی دو دن کا تھا۔ لیکن زیادہ اہم بات یہ کہ وینس ایسا شہر نہیں جہاں بہت سارا سامان لے کر جایا جا سکے۔ ائرپورٹ سے وینس جانے کے دو طریقے ہیں۔ عوامی کشتیوں کے ذریعے یا بس اور ریل کے ذریعے۔

وینس کو بقیہ اٹلی سے جوڑنے والا پل

اگر بس یا ریل کے ذریعے شہر آئیں تو یہ سواریاں وینس کے مغربی کونے میں سینٹ لُوچیا اسٹیشن کے علاقے میں اتار دیتی ہیں۔ وہاں سے چھوٹے بڑے پل عبور کرتے ہوئے پیدل ہوٹل تک پہنچنا پڑتا ہے۔ بھاری یا زیادہ سامان لے کر تنگ راستوں سے گذرنا، پل سے سامان چڑھانا اتارنا کوئی آسان کام نہیں۔ اور پہیوں والے سوٹ کیس بھی زیادہ کارآمد نہیں کیونکہ پل پر تو سامان اٹھا کر ہی لے جانا پڑے گا۔ گلیاں پتھروں اور اینٹوں سے بنی ہوتی ہیں۔ پہیوں والے سوٹ کیس چلاتے ہوئے اتنا شور ہوتا ہے کہ سیاح شرمندگی کے مارے سوٹ کیس اٹھانے کو ترجیح دیتے ہیں۔ وہاں قلی (porter) بھی مل جاتے ہیں لیکن ان کی اجرتیں ترقی پذیر ممالک کے سیاحوں کے بجٹ سے میل نہیں کھاتیں۔ تو انگریزی کا محاورہ (Trave light) اس شہر پر سو فیصد لاگو ہوتا ہے۔

دوسرا طریقہ ہے کہ کشتی کے ذریعے شہر پہنچا جائے۔ وینس کے چاروں طرف اور درمیان میں بھی کشتیوں کے لئے گھاٹ بنے ہوئے ہیں۔ اگر آپ کا ہوٹل گھاٹ سے قریب ہے تو زائد سامان کے ساتھ بھی ہوٹل پہنچا جا سکتا ہے ورنہ پھر وہی الجھن۔ ہاں اگر آپ کسی مہنگے ہوٹل میں ٹھہرے ہوں اور آبی ٹیکسی کے ذریعے ہوٹل پہنچیں تو آپ براہِ راست ہوٹل میں اتر سکتے ہیں۔ انگریزی فلم ( The Tourist ) دیکھ لیں اور اگر بجٹ اجازت دے تو یہ برا خیال نہیں۔

سودؔا جو تیرا حال ہے ایسا تو نہیں وہ[1]

اس شہرِ بے مثال کی تعریفیں تو جاری رہیں گی لیکن

خوگرِ حمد سے تھوڑا سا گلہ بھی سن لے

جتنا خوبصورت یہ شہر تصویروں میں نظر آتا ہے کچھ لوگوں کو اتنا ہی مایوس بھی کرتا ہے۔ لہٰذا وہاں جانے سے پہلے کچھ مشکلات کے لئے ذہنی طور پر تیار ہو جائیں۔ وینس جانے کے لئے صحیح موسم کا انتخاب بہت ضروری ہے چاہے وہ سیاحتی موسم ہو یا قدرتی۔ یہ شہر ہر سال کچھ مہینے سَیلِ سیاح میں ڈوبتا ہے تو کچھ مہینے سیلاب کی وجہ سے غرقِ آب ہوتا ہے۔ وینس کی آبادی ڈھائی لاکھ سے کچھ ہی اوپر ہے اور سال بہ سال اس میں کمی واقع ہو رہی ہے۔ جبکہ یہ شہر سالانہ تقریباً اڑتالیس لاکھ لوگوں کی مہمانی کرتا ہے۔ جس کا نتیجہ سیاحتی موسم میں ہر جگہ سیاحوں کے ہجوم کی صورت میں نکلتا ہے۔ تنگ گلیوں میں پیدل چلنا یا مشہور مقامات کی تصویریں کھینچنا محال ہو جاتا ہے۔

وینس کی ایک چیز، جو تصویروں میں نظر نہیں آتی، وہ ہے شہر کے کچھ حصوں میں کھڑے پانی کی بُو۔ پرانی عمارتوں کی بنیادوں میں جمی کائی ایک طرف قدامت کا انوکھا تاثر پیدا کرتی ہے تو دوسری طرف ایک مستقل بساندھ کا باعث بھی بنتی ہے۔ جو کہ کچھ لوگوں کے طبع نازک پر گراں گزرتی ہے۔1990 ؑسے قبل وینس کی نہریں غلاظت سے بھری ہوتی تھیں اور پورے شہر میں ناقابلِ برداشت بُو پھیلی رہتی تھی۔ لیکن جب 90 کی دہائی میں ایک بہت بڑے منصوبے کے تحت تمام نہروں کی صفائی کی گئی، قوانین پر عمل درآمد کو سخت کیا گیا تو نہروں کی خوبصورتی میں اضافہ ہوا اور شہر کے زیادہ تر حصوں میں تعفن کا مسئلہ حل ہو گیا۔

وینس دنیا کے مہنگے ترین شہروں میں شمار ہوتا ہے۔ خوراک، رہائش، کرائے یا میوزیم ٹکٹس، سب کی قیمتیں آسمان سے باتیں کرتی ہیں۔ ایک مشہور سیاحتی ویب سائٹ[2] کے مطابق جتنے پیسوں میں آپ اٹلی کے کسی اور شہر میں بہترین کھانا کھا سکتے ہیں اتنی قیمت میں وینس میں صرف گزارے لائق کھانا ہی ملتا ہے۔ اس کے بعد بھی ریستوران یا کیفے کے بل میں 10 سے 20 فیصد تک سروس چارجز علیحدہ سے وصول کئے جاتے ہیں۔ یہی حال بقیہ سہولیات کا بھی ہے۔ ہوٹلز کے کمرے قدیم اور گورِ موذی کی طرح تنگ۔ بہت سے ہوٹلز میں باتھ روم کمروں سے باہر ہوتے ہیں۔ لیکن کوئی بات نہیں آگے چل کر آپ کو پیسے بچانے کی کچھ ترکیبیں بھی بتائیں گے۔

وینس ایک چھوٹا سے جزیرہ ہے جس کے ایک کنارے سے دوسرے کنارے تک محض چند گھنٹوں میں پیدل پہنچا جا سکتا ہے۔ لیکن مصروف دنوں میں اگر آپ آبی بس استعمال کرنے کا سوچیں تو ممکن ہے کہ آپ کو آدھا گھنٹہ صرف بس کی قطار میں ہی گزارنا پڑے۔ انتہائی زیادہ کرایوں (75 منٹ کا ٹکٹ 9€ اور پورے دن کا ٹکٹ 25€) کے باوجود اس طرح کی ٹرانسپورٹ بہت سے سیاحوں کے لئے مایوسی کا باعث بنتی ہے۔

سفر آغاز سے پہلے

وینس کا مرکزی اور بین الاقو امی ائرپورٹ وینس کے مشہور تاجر اور مہم جُو مارکو پولو کے نام سے موسوم کیا گیا ہے۔ یہ وینس کے جزیرے پر نہیں بلکہ اٹلی کے ساحلی علاقے میں بنا ہوا ہے جسے وینس کا حصہ ہی سمجھا جاتا ہے۔ ائرپورٹ سے شہر جانے کے دو طریقے ہیں۔ پہلا، نان اسٹاپ ائرپورٹ بس جو کہ صرف 15 منٹس میں شہر پہنچا دیتی ہے اور اس کا کرایہ بھی بہت مناسب ہوتا ہے۔ دوسرا، کشتی جو تقریباً 50 منٹس میں شہر تک پہنچاتی ہے۔ اس کا کرایہ گرچہ خاصا زیادہ ہے لیکن وینس کا اصل مزہ تو گہرے ، اتھلے پانیوں کی سطح پر تیرتی کشتیوں میں ہی ہے ۔ ایک تیسرا طریقہ بھی ہے جو ذرا زیادہ مہنگا ہے ور وہ ہے آبی ٹیکسی۔ یعنی آپ پوری کشتی کرائے پر حاصل کر لیجئے اور اگر آپ کسی مہنگے ہوٹل میں ٹھہرے ہوں تو وہ آپ کو ہوٹل کے گھاٹ لے جائے گی۔

ائرپورٹ سے وینس (بس یا کشتی) کے ٹکٹ انٹرنیٹ سے بھی خریدے جا سکتے ہیں اور وہاں موجود ٹکٹ گھر سے بھی۔ انگلش کے عالمی زبان بننے کا ایک فائدہ یہ ہے کہ ٹکٹ مشینوں میں لاطینی اور انگریزی دونوں زبانوں کی سہولت موجود ہوتی ہے۔

اگر وینس آنے سے پہلے انٹرنیٹ سے ٹکٹ خریدے جائیں تو آپ کے پاس خاصا وقت ہو گا کہ آپ مختلف ذرائع رسل کی قیمتوں اور وقت کا موازنہ کر لیں۔ اور اپنی پسند کے مطابق ٹکٹ خرید لیں۔ ویسے تو وینس ائرپورٹ پہنچ کر بھی ٹکٹ خریدا جاسکتا ہے لیکن عین ممکن ہے کہ آپ جلدی میں موزوں ٹکٹ کا انتخاب نہ کر سکیں۔

وینس میں شہری ٹرانسپورٹ کا مرکزی نظام موجود ہے جس میں کشتیاں، بس اور ٹرینز شامل ہیں۔ اس ہی وجہ سے ٹکٹ مشین اتنے زیادہ options دیتی ہیں کہ سیاح الجھ جاتے ہیں اور بعض اوقات غلط ٹکٹ خرید لیتے ہیں۔ اس کے علاوہ یومیہ ٹکٹ میں بہت سے routes شامل نہیں ہوتے جو کہ جلدی میں ٹکٹ مشین پر سمجھنا یا پڑھنا بہت مشکل ہے۔ عین ممکن ہے کہ یومیہ ٹکٹ خریدنے کے بعد آپ کسی آبی بس ( Vaporetto ) میں سوار ہوں اور پتہ چلے کہ وہ روٹ آپ کے یومیہ ٹکٹ میں شامل نہیں۔ اور اس سفر کے لئے اضافی کرایہ ادا کرنا پڑے۔ بہتر یہی ہے کہ گھر سے نکلنے سے پہلے ہی وینس کے ٹرانسپورٹ نظام کو سمجھ لیں۔ یا تو انٹرنیٹ سے ہی ٹکٹ خرید لیں ۔ ورنہ کم از کم منصوبہ بندی کر لیں کہ کس دن کون سے ٹکٹ خریدنے ہیں۔ اس سے وقت اور پیسوں کی اچھی خاصی بچت ہو جائے گی۔

آب در آب مرے ساتھ سفر کرتے ہیں [3]

آخرِکار سفر کا دن آ گیا۔ ہم نے گھر کے قریب گیٹ وِک ائرپورٹ سے مارکو پولو ائرپورٹ کی فلائٹ لی۔ تقریباً دو گھنٹے بعد ہم وینس پہنچ گئے۔ اٹلی میں داخل ہونے کے بعد وینس تک جس طرح آب پاشی کے لئے نہروں کا جال بچھا تھا، وہ صرف نظر نواز ہی نہیں بلکہ حیرت انگیز بھی تھا۔ حد نگاہ تک سبز کھیت اور ان کے درمیان گزرنے والی نہروں کا پانی ، پگھلی ہوئی چاندی کی طرح دھوپ کو منعکس کر رہا تھا۔ نہروں کا جال کچھ اس طرح بنُا ہوا تھا جیسے قدرت کے سبز ہاتھ پر روپہلی رگیں نمایاں ہوں۔ منزل پر پہنچنے سے پہلے ایک شاندار نظارہ اس وقت ہوا جب ہمارے جہاز نے وینس کے اوپر سے پرواز کی۔ پورا وینس ایک تصویری نقشے کی طرح ہمارے قدموں میں بکھرا ہوا تھا۔ سمندر کے بیچوں بیچ سرخ چھتوں سے اٹا جزیرہ جہاں قدیم کلیساؤں کے قد آور مینار، سبز پڑتے ہوئے، تانبا چڑھے عظیم الشان گنبد، شہر کو دو حصوں میں تقسیم کرنے والی دلکش نہر اور جا بجا تیرتی چھوٹی بڑی کشتیاں پہلی نظر میں ہی دل میں اتر گئیں۔

وینس دیکھتے ہی میرے ذہن میں شہر کی تاریخ گھومنے لگی۔ اس کی تاریخ کا آغاز 568 عیسوی میں رومی سلطنت کے زوال کے ساتھ ہوتا ہے جب لومبارڈ حملہ آوروں نے شمالی اٹلی کے باشندوں کو ان کے علاقوں سے باہر دھکیل دیا۔ مقامی باشندے اپنے جان بچانے کے لئے اٹلی سے متصل سمندری جھیلوں پر مشتمل دلدلی علاقوں (Lagoons) میں پناہ لینے پر مجبور ہو گئے۔

ان چھوٹے، چھوٹے بے نام جزائر پر مچھیرے اور سمندری نمک بنانے والے افراد رہتے تھے۔ یہ علاقہ کسی بھی طرح شہر آباد کرنے کے قابل نہ تھا۔ اکثر سمندری پانی چڑھتا اور یہ علاقے سمندر برد ہو جاتے ۔ سمندر اترنے کے بعد سب جزیرے دلدلی علاقوں میں بدل جاتے ۔یہی وجہ تھی کہ لومبارڈ حملہ آوروں نے اس علاقے پر حملہ نہیں کیا اور پناہ گزینوں کو اپنی جان بچانے کا موقع مل گیا۔ یہ پناہ گزین ہنر مند تھے لہٰذا وقت کے ساتھ انہوں نے وینس کو ترقی دے کر ایک شہر کی حیثیت سے مستحکم کر دیا۔ اور آج یہ تاریخی شہر میری نظروں کے سامنے تھا۔

اک نگری سبز امنگوں کی - اک زندہ شہر خزینوں کا [4]

مارکو پولو ائرپورٹ پر لینڈ کرنا ایک الگ ہی تجربہ ہے۔ ہوائی اڈا سمندر کے کنارے پر بنا ہوا ہے۔ سمندر کے ساتھ، ساتھ لینڈ کرتے ہوئے بالکل ایسا لگ رہا تھا جیسے ہمارا جہاز کسی ائر کرافٹ کیرئیر پر اتر رہا ہو۔ مارکو پولو ائرپورٹ ایک چھوٹا سا لیکن جدید اور صاف ستھرا ائرپورٹ ہے۔ ائرپورٹ کی دیواریں اور فرش اٹلی کی نوادرات اور مجسموں کی قدآور تصاویر سے مزئین ہیں جن کی وجہ سے ائرپورٹ پر قدیم اور جدید کا حسین ملاپ نظر آتا ہے۔ یورپی اور امریکی سیاحوں کے لئے ڈیجیٹل پاسپورٹ کنٹرول تھا لہٰذا وہاں لمبی قطاریں نہیں تھیں۔ لیکن یہاں اطالویوں نے اپنی مشرقیت کا ثبوت دیا کہ ڈیجیٹل پاسپورٹ گیٹ کے باہر دو اہلکار بیٹھے تھے جو ہر پاسپورٹ پر داخلے کی مہر لگا رہے تھے۔ ائرپورٹ کے دروازے سے نکلتے ہی خصوصی ائرپورٹ بسیں قطار بنائے کھڑی تھیں۔ ہم نے انٹرنیٹ کے ذریعے وینس جانے والی بس کی بکنگ کروا لی تھی اس لئے وینس جانے والی پہلی بس میں سوار ہو گئے۔ اس بس نے ہمیں ’آزادی پل‘ (Ponte Della Libertà) کے راستے 15 منٹس میں وینس کے مرکزی بس اڈے (Piazzale Roma) پر اتار دیا۔ وینس جزائر پر مشتمل شہر ہے جس کا باقی اٹلی سے کوئی زمینی رابطہ نہ تھا۔ 1846 ؑ میں وینس اور اٹلی کے علاقے ماسترے کے درمیان ایک 3.6 کلومیٹر لمبا ریلوے پل بنایا گیا ۔ اس طرح پہلی دفعہ اٹلی سے زمینی راستے کے ذریعے وینس جانا ممکن ہو سکا۔ یہ پل آج بھی جدید ترین ٹرینوں کے لئے استعمال ہوتا ہے۔ 1933 ؑ میں اس کے ساتھ ہی ایک اور پل کی تعمیر مکمل ہوئی جسے یوجینو میوزی نامی انجینئر نے ڈیزائن کیا اور مشہور ڈکٹیٹر مسولینی نے اس کا افتتاح کیا۔ پہلی جنگِ عظیم کے بعد آمریت کے خاتمے اور نازی قبضے کے اختتام کی یادگار کے طور پر اس کا نام ’آزادی پل‘ رکھ دیا گیا۔ اس پر ٹرام، بس/ کار، سائیکل اور پیدل چلنے کے الگ، الگ راستے بنے ہیں۔

پیازالے روما بس اڈے پر اترتے ہی ایسا لگا جیسے کسی جلوس میں پھنس گئے۔ چاروں طرف بسیں، ٹرام اور ہر طرف چلتے دوڑتے لوگ۔ بالکل ایسا لگا جیسے کراچی کے صدر بازار پہنچ گئے۔ لیکن کچھ دیر میں اندازہ ہوا کہ (there is a method in madness) اس دیوانگی میں بھی فرزانگی کے آثار ہیں۔ ہر بس کی اپنی پارکنگ کی جگہ مقرر تھی جہاں اس کے روٹ کی مکمل تفصیل بورڈز پر موجود تھی۔ بس اڈے کے درمیان سے ٹرام بھی گذرتی ہے لیکن لوگوں کے پیدل چلنے کے لئے راستے بنے ہوئے ہیں اور زیبرا کراسنگ بھی بنی ہوئی ہیں جس کی وجہ سے وہاں ایسی ہڑبونگ نہیں تھی جیسی پاکستان کے بس اڈوں پر نظر آتی ہے۔

بس اڈے کے بالکل ساتھ شہر کو تقسیم کرنے والی نہرِ عظیم (Grand Canal) اور اس پر بنا ہوا پل ِ دستور (Ponte della Costituzione) تھا۔ اصولی طور پر تو ہمیں اپنی سیاحت کا آغاز وہیں سے کرنا چاہئے تھا لیکن اس وقت ہمارے لئے پیٹ پوجا زیادہ ضروری تھی ۔ ہم نے پہلے ہی گوگل کی مدد سے کچھ حلال کھانے کی جگہیں نشان زد کر لی تھی۔ ان میں قریب ترین (Pizzeria fantasia) نام کی حلال کھانے کے دکان تھی۔ اس دکان کا (Calzone) اچھا تھا لیکن اس دکان پر کام کرنے والی بنگالی لڑکی کی باتیں اس سے زیادہ مزے دار تھیں۔ جب اسے پتہ چلا کہ ہم پاکستانی ہیں تو اس نے انڈین گاہکوں کی ستم ظریفیوں کی داستانیں سنانی شروع کر دیں۔ چونکہ ہمارا ارادہ ایک نئی انڈو-پاک جنگ شروع کروانے کا نہیں تھا اس لئے ہم نے اس کا غصہ ٹھنڈا کیا اور اپنا کھانا ختم کرکے باہر نکل گئے۔ اب شہر کی سیاحت شروع کرنی تھی اور اس کے لئے وینس کی مرکزی نہر سے بہتر جگہ کون سی ہو سکتی تھی؟

وینس کی نہرِ عظیم

وینس کا حسن، اس کی شان، پہچان اور اس کی شہ رگ ہے اس کی نہرِ عظیم۔ انگریزی میں Grand Canal، لاطینی میں Canal Grande اور مقامی لوگوں کے لئے صرف کنالازو ( Canalazzo) ۔

نہرِ عظیم، شہر کو دو حصوں میں تقسیم کرتی ہے۔ تین ڈسٹرکٹ شمال مشرق میں اور تین ڈسٹرکٹ جنوب مغرب میں۔ جبکہ شہر کو جوڑنے کی ذمہ داری چار مشہور پُلوں نے اٹھائی ہوئی ہے جن کا ذکر آگے آئے گا۔ یہ نہر چار کلومیٹر لمبی ہے۔ کہیں یہ 100 فیٹ چوڑی ہے اور کہیں اس کی چوڑائی 225 فیٹ تک پہنچ جاتی ہے۔ جبکہ اس کی زیادہ سے زیادہ گہرائی 16 فیٹ ہے۔ کہتے ہیں کہ چودھویں صدی عیسوی میں یہاں ایک ایسا زلزلہ آیا جس سے اس نہر کا پانی چھلک کر سمندر میں چلا گیا اور کچھ عرصے کے لئے نہر ایک دلدلی شاہراہ بن کر رہ گئی۔ لیکن جب سمندر چڑھا تو نہر میں پانی واپس آ گیا اور وہ اپنی اصل شکل میں واپس آگئی۔ یہی نہیں بلکہ یہ نہر کبھی کبھار سردیوں کا بھی لحاظ کر لیتی ہے۔ آخری بار 2012 ؑ میں سردیوں میں یہ نہرِ جم گئی تھی ۔

کنالازو کو شہر کی( High Street) کہا جا سکتا ہے۔ نہر کے دونوں طرف قدیم اور شاندار عمارتیں قطار اندر قطار بنی ہوئی ہیں۔ ہر عمارت کی ایک تاریخ ہے اور کئی داستانیں۔ یہ ساری عمارتیں نہ تو کشتی کے ایک چکر میں دیکھی جا سکتی ہیں اور نہ ہی ان کی تاریخ سے لطف اٹھایا جا سکتا ہے۔ اگر وقت اور وسائل ہوں تو اس خوبصورت نہرِ کی بار، بار یاترا کو واجب ہی سمجھیں۔

وینس اگر چہ نہروں کا شہر ہے لیکن اسے بجا طور پر پُلوں کا شہر بھی کہا جا سکتا ہے۔ اس شہر میں 391 پل ہیں جو 150 نہروں کو عبور کرنے کے کام آتے ہیں [5]۔ لیکن ان میں سب سے مشہور وہ چار پل ہیں جو نہر عظیم پر بنے ہوئے ہیں۔ ہم نے بھی شہر کی سیر کا آغاز نہرِ عظیم پر بنے سب سے نئے پل سے کیا۔

اک رستہ روشن زِینوں کا

وینس کے بس اڈے رومی میدان (Piazzale Roma) کے برابر میں مرکزی نہر کا پہلا اور جدید پل نظر آتا ہے جو 2008 ؑ میں مکمل ہوا۔ اس ہی سال اطالوی آئین کی ساٹھویں سالگرہ منائی جا رہی تھی اس لئے اس کا نام ’دستوری‘ پُل (Ponte della Costituzione) رکھا گیا۔ لیکن مقامی لوگ اسے ’کالاٹراوا ‘پل (Ponte Di Calatrava) کہتے ہیں۔ اس پل کی خاص بات اس کی شیشے سے بنی دیواریں ہیں، جو نہر کے رنگ میں رنگی نظر آتی ہیں۔ اور دوسری خاص بات اس کی دودھیا شیشے سے بنی سیڑھیاں ہیں ۔ دیواروں اور سیڑھیوں کے نیچے فلوریسینٹ لائٹس لگی ہیں۔ جن کی وجہ سے رات میں جگمگاتا ہوا پل بہت خوبصورت لگتا ہے۔ اس پل کے ایک طرف وینس کی مرکزی نہر ہے اور دوسری طرف کھلے سمندر کا راستہ ہے۔ ایک طرف ہلکورے لیتی نہر ہے تو دوسری طرف سمندر کی عظیم الجثہ موجیں۔ ایک ہی جگہ اتنا خوبصورت تضاد کم ہی نظر آتا ہے۔

’دستوری‘ پل سے آگے وینس کا ریلوے اسٹیشن سانتا لُوچیا (Venezia Santa Lucia) ہے۔ باہر سے سادہ اور خوبصورت نظر آنے والی عمارت اندر سے اتنی ہی وسیع اور پُرشکوہ ہے۔ اس اسٹیشن میں 23 پلیٹ فارم ہیں جہاں سے انتہائی جدید، آرام دہ اور تیز رفتار ٹرین چلتی ہیں۔ اس اسٹیشن پر شاپنگ سینٹر بھی ہے اور ساتھ ہی سیاحوں کا سامان رکھنے کی بہت عمدہ سہولت بھی موجود ہے ۔

اسٹیشن سے باہر نکلتے ہی ایک بڑا سا میدان ہے جس کے پرے، نہر کے پار سینٹ سائمن کا گرجا (Chiesa di San Simeon Piccolo) جسے دیکھ کر سیاح مبہوت رہ جاتے ہیں۔ یہ گرجا 1738 ؑ میں مکمل ہوا۔ اس کا سامنے کا حصہ نیوکلاسیکل طرز تعمیر کی ابتدائی شکل ہے تو اس کا گنبد اور درمیانی گرجا کا حصہ سان مارکو کلیسا کا رنگ لئے ہوئے ہے۔ اپنے عظیم الشان گنبد کی وجہ سے یہ گرجا اپنے اصل سے کہیں بڑا دکھائی دیتا ہے۔ یہ گرجا ، سانتا کروچے (مقدس صلیب) کے علاقے میں ہے جو شہر کے کونے میں ہونے کی وجہ سے ایک زمانے میں غریب علاقہ شمار ہوتا تھا۔ لیکن وقت کے ساتھ اس علاقے کے سامنے پہلے ٹرین اسٹیشن بنا۔ پھر بس اور ٹرام اسٹیشن۔ اور پھر دستوری پل نے اسے کیناریجیو ضلع (جہاں بس اور ٹرین اسٹیشن ہیں)سے اس طرح ملا دیا کہ اب یہ شہر کے مصروف علاقوں میں شمار ہوتا ہے۔

راہبوں کا رستہ

سانتا لوچیا اسٹیشن سے چند قدم کے فاصلے پر مرکزی نہر کا دوسرا پل (Ponte degli Scalzi) آ جاتا ہے جس کا مطلب ہے ننگے پَیر راہبوں کا پل۔ مقامی ماربل سے بنا یہ خوبصورت پل 1934 ؑ میں مکمل ہوا ۔ اس سے پہلے یہاں آسٹرین سلطنت کا بنایا ہوا ایک لوہے کا پل تھا جو وینس کے طرزِ تعمیر سے بالکل مطابقت نہیں رکھتا تھا۔ لیکن نئے پل کا طرز تعمیر اطراف کی عمارات سے مکمل طور پر ہم آہنگ ہے اور منظر کا فطری حصہ محسوس ہوتا ہے۔ اپنے قدیمی طرز تعمیر کے باعث یہ پل سیاحوں میں ’ستوری‘ پل سے زیادہ مقبول ہے۔

اس پل کے بعد مرکزی نہر کے ساتھ چلنے کا کوئی راستہ نہیں۔ اس لئے اگلے پل تک کا سفر وینس کی پیچ در پیچ گلیوں میں کرنا پڑا۔ وینس کے رازدان کہتے ہیں کہ وینس کو جاننا اور سمجھنا ہے تو اس کی گلیوں میں کھو جاؤ ، اس کی قدامت کو محسوس کرو۔ اصل وینس آج بھی ان گلیوں میں چھُپا ہے۔ آج بھی کئی گلیاں ایسی ہیں جہاں بجلی کی روشنی بند کرکے چراغ جلا دیئے جائیں تو جدید زمانے کا کوئی سراغ ڈھونڈے سے بھی نہ ملے گا۔ سو ہم نے بھی اپنے آپ کو ان گلیوں میں کھونے کے لئے آزاد چھوڑ دیا۔

وینس پتلی، پتلی پیچ در پیچ گلیوں پر مشتمل شہر ہے۔ کچھ گلیاں مشہور سیاحتی مقامات کو جوڑتی ہیں۔ ان گلیوں میں ہمہ وقت چہل پہل رہتی ہے۔ سیاحوں کا شور سنائی دیتا ہے۔ اور اس سے زیادہ مقامیوں کے زور، زور سے باتیں کرنے کی آوازیں ۔ قدم ، قدم پر کیفے، ریسٹورینٹ، اور ہمہ اقسام کی دکانیں نظر آتی ہیں۔ ایسا لگتا ہے جیسے کسی میلے میں آئے ہوئے ہیں۔ لیکن جیسے ہی ان کے پیچھے شاخ در شاخ، چھوٹی گلیوں میں نکل جائیں، آوازیں معدوم ہو تی جاتی ہیں۔ ایک سکون کا احساس سیاح کو اپنے اندر سمیٹ لیتا ہے۔ ایسے قدیم مکانات کے درمیان، جن کی بنیادوں سے پلستر جھڑ رہا ہوتا ہے اور بارشوں میں کھڑا ہونے والا پانی اپنے نشان چھوڑ گیا ہوتا ہے۔ جہاں گرمیوں میں بھی سِیلی ہوئی خنکی کا احساس ہوتا ہے۔ صدیوں پرانے مکان اور ان مکانوں کی کھڑکیوں پر لگی لکڑی کی چقیں ۔ کھڑکیوں پر لگے چھوٹے، چھوٹے گملوں میں خوشنما پھول۔ لکڑی کے دروازے جن کا رنگ نیچے سے اکھڑ رہا ہو۔ جن پر دروازہ کھٹکھٹانے کے لئے پیتل کے شیر کی شکل والے کنڈے لگے ہوں اور گھر سے باہر گھنٹی (door bell)کے لئے 100 سال پرانی طرز کا پیتل کا سوئچ ۔ ان گلیوں میں وقت صدیوں پہلے ہی تھم گیا تھا ۔ اور آج بھی سیاحوں کو اپنے ساتھ اسی ماضی میں لے جاتا ہے۔

بہرحال ہم مستقل طور پر ماضی میں رہنے کو تیار نہیں تھے اس لئے سیاحوں کے جانے پہچانے رستوں پر واپس آ گئے۔ راستے میں (Palazzo Mora)میں European Cultural Centre نام کی ایک آرٹ گیلری نظر آئی جہاں فلسطینی فنکاروں کے کام کی نمائش ہو رہی تھی۔ اگرچہ ہمیں آرٹ کی سمجھ بوجھ تو نہیں لیکن فلسطینی بھائیوں سے اظہارِ یکجہتی کے لئے اندر چلے گئے۔ اندر فلسطینیوں کے علاوہ اور بھی کئی ملکوں کے فنکاروں کا کام رکھا ہوا تھا۔ کچھ سمجھ آیا اور کچھ پر غصہ آیا کہ یہ کس قسم کا آرٹ ہے؟ لیکن شاید وہ ویسے ہی فنکار تھے جیسے ہم مصنف بننے کی کوشش کئے جا رہے ہیں۔

راستے میں ایک سپر اسٹور (Despar Teatro Italia)نظر آیا۔ دیکھنے میں بڑا رئیسانہ قسم کا اسٹور لگ رہا تھا۔ سوچا کہ یہاں سے پانی خرید لیتے ہیں۔ لیکن اندر شیلف پر پانی کی علیحدہ بوتلیں نہیں رکھی تھیں۔ بلکہ ساری 6 کے پیک میں تھیں۔ اب ہم پانی کی 6 بوتلیں کہاں اٹھائے پھرتے لہٰذا وہاں سے پانی نہیں خریدا۔ بعد میں پتہ چلا کہ وینس کے اسٹورز میں 6 بوتلوں کے پیک بغیر کھولے ہی شیلف پر رکھ دئیے جاتے ہیں۔ خریدار چاہیں تو ان میں سے ایک، ایک بوتل نکال کر بھی خرید سکتے ہیں۔ ہمیں برطانیہ کی عادت ہے جہاں شیلف پر کھلی ہوئی بوتلیں رکھی ہوتی ہیں اور انفرادی طور پر خریدی جا سکتی ہیں۔ اور اگر 6 کا پیک ہو تو وہ پورا پیک ہی خریدنا پڑتا ہے۔ لیکن چلیں وینس کا ایک اور راز معلوم ہو گیا۔ جس کا فائدہ بعد میں ہوا۔

وینس کی پہچان

اس ہی طرح گھومتے پھرتے شہر کے وسط میں پہنچ گئے۔ جہاں وہ تاریخی پل ہے جسے یقینی طور پر وینس کی نہر کے سر کا تاج کہا جا سکتا ہے۔ اس کا نام ریالٹو(Ponte Di Rialto) ہے۔ یہ نہرِ عظیم پر بنا پہلا پل تھا جو سنہ 1173 ؑ میں بنا۔ پہلی بار اسے کشتیوں پر تختے رکھ کر عارضی پل (Pontoon bridge) کی طرح بنایا گیا۔ اس کے بننے سے پہلی بار شہر کے دونوں حصوں میں پیدل جانا ممکن ہو سکا۔ اس کے قریب ہی قدیم ریالٹو مارکیٹ تھی جس کی اہمیت میں اضافہ ہوا اور وہ شہر کی مرکزی منڈی کی حیثیت اختیار کر گئی۔ اس کی اہمیت کو دیکھتے ہوئے 1255 ؑ میں یہاں لکڑی کا مستقل پل بنایا گیا۔ اگلے تین سو برس میں اس پل کو آگ لگنے سے خاصا نقصان ہوا۔ اور دو مرتبہ تو بہت زیادہ لوگوں کے جمع ہونے سے دریا بُرد بھی ہو گیا۔ آخرِکار 1591 ؑ میں یہاں پتھر اور ماربل سے نیا پل بنایا گیا جو آج تک قائم ہے۔ اس پل کی خاص بات یہ ہے کہ اس کے دونوں طرف پیدل چلنے کا راستہ ہے اور درمیان میں ایک پوری مارکیٹ ہے۔ یہ پل اپنی قدامت، خوبصورت طرز تعمیر کی وجہ سے سیاحوں میں اور افادیت کی وجہ سے مقامیوں میں یکساں مقبول ہے۔

اس خوبصورت پل تک پہنچتے، پہنچتے شام ہو چلی تھی۔ اور تھکن سے ہمارا حال یہ تھا کہ ہم ریالٹو پر صحیح طرح اپنی تصویریں بھی نہ بنا سکے۔ ہم صبح 3 بجے کے اٹھے ہوئے تھے اور اس کے بعد مسلسل سفر میں تھے۔ لہٰذا یہاں پہنچ کر ہماری ’بس‘ ہو گئی۔ ابھی ’پیازالے روما ‘جانا تھا جہاں سے ہوٹل کے لئے بس لینی تھی۔ تو واپسی کا سفر شروع ہوا۔ اس بار ہم نے نہر کے دوسرے کنارے پر جانے کا فیصلہ کیا۔ پھر وہی پیچ در پیچ گلیاں۔ اتنی پتلی گلیاں کہ یقین ہی نہ آتا تھا کہ ہم صحیح راستے پر جا رہے ہیں۔ لگتا تھا کہ راستہ بھول کر کسی محلے کی گلی میں پہنچ گئے ہیں اور آگے جا کر یہ گلی بند ہو جائے گی۔ لیکن وینس، وینس ہے۔ پتلی گلی کسی چوڑی گلی میں کھلتی۔ چوڑی گلی کسی میدان تک پہنچا دیتی۔ اور وہاں سے پھر کسی پتلی گلی میں۔

نشانِ راہ ملے بھی یہاں تو کیسے ملے؟ [6]

وینس جیسے راستوں کے نشانات دنیا میں کم ہی ملیں گے۔ ہم نے پہلی دفعہ یہ نشانات دیکھے تو سٹپٹا گئے۔ گوگل سے مدد لی۔ تب اندازہ ہوا کہ یہ نشان سو فیصد غلط بھی نہیں۔ ان کا مطلب ہے کہ دونوں طرف کسی بھی گلی سے نکل جائیں آگے ایک ہی بڑی گلی میں پہنچیں گے۔ لیکن یہ نشان ایک دفعہ تو ہر نئے سیاح کو چکرانے میں کامیاب ہو جاتے ہیں۔

گھومتے گھماتے، وینس کے کیفے سے فیضیاب ہوتے، راستے میں ایک سپر اسٹور سے 2 لٹر پانی کی دو بوتلیں بھی خرید لیں۔ اور وہ بھی صرف 0.80€ میں۔ اس سے پہلے کیفے اور کھانے کی دکانوں سے 2/1 لٹر پانی کی بوتل €1.50 میں خرید رہے تھے۔ اس حساب سے تو ایک وقت میں ہی 11€ کی بچت ہو گئی۔

آخرِکار ’پیازالے روما ‘ پہنچے۔ ٹکٹ آفس سے بس کا ٹکٹ لیا اور سامنے کھڑی ہوئی بس میں سوار ہو گئے۔ بسیں اس ہی معیار کی ہیں جیسی کراچی کی گرین لائن پر چلتی ہیں۔ شاید نشستیں کچھ زیادہ بہتر تھیں۔ ہماری رہائش جزیرے کے پار، اٹلی کے ساحلی شہر میں تھی۔ یہ سارا علاقہ بھی وینیزیا کہلاتا ہے اور وینس کی شہری حکومت کے تحت آتا ہے۔ اس کو زیادہ آسانی سے کچھ ایسے سمجھا جا سکتا ہے کہ وینس، منوڑہ کی طرح ایک جزیرہ ہے۔ اور وینیزیا کے علاقے کراچی کی طرح ایک مکمل شہر جو کہ باقی اٹلی سے زمینی طور پر ملا ہوا ہے۔ 15 سے 20 منٹ کے اندر بس نے ہمیں ماسترے (Mestre) کے ٹرین اسٹیشن تک پہنچا دیا جہاں ہم نے اپارٹمنٹ لیا ہوا تھا۔

وینس دنیا کے ان چند شہروں میں سے ہے جہاں مقامی آبادی بڑھنے کے بجائے کم ہو رہی ہے۔ یہ چھوٹے، چھوٹے جزیروں پر مشتمل قدیم شہر ہے جس کا رقبہ بڑھانے کا کوئی طریقہ نہیں۔ وقت کے ساتھ ،ساتھ یہ بڑھتی ہوئی آبادی کو رہائش فراہم کرنے میں بری طرح ناکام رہا ہے ۔ اس پر شہری حکومت کے سخت تعمیراتی قوانین بھی اس شہر میں مزید مکانیت پیدا کرنے میں شدید رکاوٹ ہیں۔ شہری حکومت کی اجازت کے بغیر کسی بھی عمارت کا بیرونی ڈیزائن یا رنگ تبدیل نہیں کیا جا سکتا۔ چہ جائیکہ یہاں کثیر المنزلہ عمارتیں تعمیر کی جائیں۔ لہٰذا وقت کے ساتھ، ساتھ یہاں کی آبادی قریبی علاقے ماسترے میں منتقل ہونا شروع ہو گئی۔ یہاں کے بہت سے مکان دنیا بھر کے امیر لوگوں نے خرید لئے جہاں وہ سال میں ایک، دو بار چھٹیاں منانے آ جاتے ہیں ۔ اس کے علاوہ مکانات کی بڑی تعداد ہوٹلوں میں تبدیل ہو گئی ہے۔ جن کی آمدنی سے لوگ نہ صرف اپنا گھر چلا رہے ہیں بلکہ ماسترے اور قریبی علاقوں میں بڑے اور جدید مکانات رکھنے کے قابل ہیں۔ یہی وجہ ہے کہ صبح لوگوں کی ایک بڑی تعداد وینس میں داخل ہوتی ہے۔ دن بھر اپنا رزق کماتی ہے اور شام ڈھلے جوق در جوق اس شہر سے باہر جا رہی ہوتی ہے۔ اس ہی لئے چھوٹے سے شہر میں داخل ہونے اور واپس جانے کے لئے 23 پلیٹ فارم والے ٹرین اسٹیشن، بس کے درجن بھر روٹ اور ٹرام جیسی عوامی سفری سہولیات کی ضرورت پڑتی ہے۔

ہم نے ماسترے ٹرین اسٹیشن کے پاس اپارٹمنٹ کرائے پر لیا تھا۔ جتنے پیسوں میں ہم وینس کے کسی ہوٹل میں صدیوں پرانا چھوٹا سا کمرہ کرائے پر لیتے، ماسترے میں پورا اپارٹمنٹ مل گیا جس میں علیحدہ خواب گاہ، باتھ روم اور اتنا بڑا باورچی خانہ تھا کہ اس میں بڑی کھانے کی میز بھی رکھی تھی۔ اپارٹمنٹ کے دونوں طرف بالکونی تھی جو کسی ہوٹل میں ملنا ممکن نہیں تھیں۔ شام کا کھانا ہم نے ماسترے میں کھایا۔ ویسے تو ماسترے ٹرین اسٹیشن کے قریب بہت عمدہ ریسٹورینٹ موجود تھے لیکن حلال ریسٹورینٹ محض چند ایک تھے۔ ہم قریبی حلال ریسٹورینٹ (Brother Fast Food Donor kebab) چلے گئے۔ یہاں کے عملے میں خیر سے سارے ہی ایشیائی مل گئے۔ پاکستانی، انڈین، بنگالی اور افغانی۔ ان کا افغانی پلاؤ بہت لذیذ تھا۔ گائے کا گوشت اتنا ہی نرم اور گلا ہوا تھا جیسا کہ افغانی پلاؤ میں ہونا چاہئے اور یہی خوبی چاولوں کی بھی تھی۔ ان کا شاورما، ترکی کے ڈونر کباب سے خاصا مختلف تھا۔ گوشت ، ڈونر کی طرح سخت نہیں تھا بلکہ نرم ، رسیلا اور بہت لذیذ تھا۔ شاورما کی روٹی خستہ تھی اور کھانے میں آسان۔ انہوں نے ہم سے پیسے تو کچھ زیادہ لے لئے لیکن کھانا اتنا مزے دار تھا کہ ہم نے اس طرف توجہ دینے کی ضرورت محسوس نہیں کی۔

رات کے آٹھ بج چکے تھے۔ صبح تین بجے اٹھ کر فلائٹ لینے کے بعد ہم وینس میں پورا دن چلتے رہے۔ گوگل صحت (Health) پر دیکھا تو پتہ چلا کہ صبح سے 15 کلومیٹر پیدل چل چکے ہیں۔ پہلے تو کافی پینے کا ارادہ تھا لیکن مزید کہیں بیٹھنے کی ہمت نہیں تھی۔ لہٰذا اپارٹمنٹ پہنچے اور سیدھا بستر میں چھلانگ لگا دی۔ کچھ یاد نہیں کہ نیند آنے میں کچھ سیکنڈ لگے یا بستر پہ گرنے سے پہلے ہی سو چکے تھے۔ بس اتنا یاد ہے کہ پوری رات خواب میں بھی ٹانگوں میں درد ہوتا رہا۔ بہر حال نیند دنیا کی سب سے بہترین دوا ہے۔ صبح اٹھے تو تازہ دم ہو چکے تھے۔ تیار ہوئے اور ناشتہ کرنے نکل گئے۔ ماسترے اسٹیشن کے کیفے ریسٹورینٹ میں ناشتہ کیا۔ اسٹیشن کے سامنے (Soul Kitchen Café)کیفے میں (Lavazza) کافی دستیاب تھی۔ یہاں مقامی لوگ بڑی تعداد میں بیٹھے تھے۔ ہم نے بھی وہاں اچھی سی کافی پی۔ سیاحت کا سنہری اصول یہ ہے کہ جس جگہ جائیں، دیکھیں کہ مقامی کہاں سے کھانا کھا رہے ہیں اور وہ جگہ کتنی مصروف ہے۔ اگر کسی ریسٹورینٹ میں مقامی لوگوں کا ہجوم ہے تو اس کا مطلب ہے کہ کھانا مزے دار ہوگا اور قیمت مناسب ۔ یہی وجہ ہے کہ ہم نے اس کے برابر موجود (Ristorante Da Tura) کو نظر انداز کیا حالانکہ وہ زیادہ خوبصورت کیفے تھا لیکن نہ تو وہاں رات کو زیادہ گاہک تھے اور نہ ہی صبح ۔

اطالوی کافی بنانے کے لئے دنیا بھر میں مشہور ہیں۔ آپ کسی بھی مقامی یا بین الاقو امی کیفے چلے جائیں عمدہ کافی اور کھانے پینے کی چیزیں مل جائیں گی۔ پاکستان میں ہم جس طرح کی ہلکی کافی پیتے ہیں وہ یہاں Coffee Latte کہلاتی ہے۔ اس کے علاوہ Cappuccino بھی ہمارے مزاج سے قریب تر ہے۔ لیکن کبھی غلطی سے بھی Espresso مت منگوا لیجئے گا کیونکہ یہ خالص تلخ کافی کا چھوٹا سا کپ ہوتا ہے جس کے عام پاکستانی عادی نہیں ہوتے۔

یہاں ایک چھوٹا سا سبق ملا۔ میں کسی بھی ملک جاتے ہوئے وہاں کی کچھ مقامی کرنسی لے جاتا ہوں تاکہ پہلے دن کی ضروریات پوری ہو جائیں۔ پھر اس ہی ملک میں ضرورت کے مطابق برطانوی پاؤنڈز بُھنواتا رہتا ہوں۔ وینس میں بھی یہی کیا۔ لیکن جب اگلی صبح پیسے تبدیل کروانے پہنچا تو پہلی بات یہ پتہ چلی کہ دوسرے ممالک کی طرح یہاں قدم ،قدم پر صراف نہیں ملتے۔ پیسے یا تو بینک سے تبدیل ہوتے ہیں یا کچھ خاص جگہوں پر صراف ہوتے ہیں جیسے ائرپورٹ، ریلوے اسٹیشن وغیرہ۔ میں برطانیہ سے برطانوی پاؤنڈ (£1=€1.12) کے حساب سے لے کر آیا تھا۔ لیکن جب ماسترے اسٹیشن پر موجود صراف کے پاس پہنچا تو پتہ چلا کہ یہاں (£1=€0.74) کے حساب سے ملے گا۔ اور اس کے اوپر £5 فیس بھی دینی پڑے گی۔ اس طرح جہاں مجھے £100 کے 112€ ملنے چاہئے تھے وہاں مجھے صرف 70€ ملیں گے۔ یہ خاصا بڑا فرق تھا۔ میں نے اپارٹمنٹ واپس آکر انٹرنیٹ کھنگالا تو پتہ چلا کہ اگر میں اپنے برطانوی بینک کارڈ پر ATM سے پیسے نکلواؤں تو مجھے 100£ کے بدلے تقریباً 95€ مل جائیں گے۔ یہ پھر بھی کم نقصان تھا لہٰذا ATM سے ہی پیسے نکلوائے۔ ایک دوسرا راستہ یہ بھی تھا کہ میں ہر جگہ بینک کارڈ سے ادائیگی کر دیتا۔ لیکن اس طرح مجھے ہر ادائیگی پر بینک کو 1.50£ کی اضافی فیس دینی پڑتی۔ حاصلِ کلام یہ کہ جب یورو زون میں جائیں تو اپنے ملک سے ہی یورو لے کر جائیں۔ یورپ پہنچ کر یورو خریدنا بہت مہنگا پڑے گا۔

بہرحال یہ قصہ تمام ہوا۔ اپارٹمنٹ پہنچ کر چیک آؤٹ کیا۔ سامان اٹھا کر ماسترے ٹرین اسٹیشن پہنچ گئے۔ ٹرین کا ٹکٹ لیا جو کہ برطانیہ کے لحاظ سے خاصا سستا تھا۔ 5 منٹ سے کم میں ہی ٹرین آگئی۔ یہ ٹرین پاکستان اور برطانیہ سے خاصی مختلف تھی کیونکہ یہ دو منزلہ ٹرین تھی۔

ہم نے فوری طور پر اوپری منزل پر سیٹ سنبھال لی اور ٹرین کی بڑی، بڑی کھڑکیوں سے باہر کے نظاروں سے لطف اندوز ہونے لگے۔ ماسترے کے بعد اگلا اور آخری اسٹیشن سینٹ لوچیا، وینس ہے۔ تیز رفتار ٹرین یہ فاصلہ تقریباً 10 منٹ میں طے کر لیتی ہے۔ لیکن ان 10 منٹس میں کچھ شاندار مناظر سفر کو یادگار بنا دیتے ہیں۔ خصوصاً آزادی پل سے گذرتے ہوئے جو کہ سمندر پر بنا ہوا ہے۔ سبک رفتار ٹرین میں اس پل سے گذرتے ہوئے ایسا لگا جیسے ہم ٹرین میں نہیں کسی بڑے پانی کے جہاز (cruise ship) میں سوار ہوں۔

ایک اطالوی جوڑا اپنے پوتے کو وینس کے سیر کے لئے لے جاتے ہوئے

سان مارکو پیازا

دوسرے دن کا آغاز ہم نے سان مارکو میدان (Piazza San Marco) سے کیا۔ ایک روایت کے مطابق نپولین بونا پارٹ نے سان مارکو پیازا کو ’یورپ کا خوبصورت ڈرائنگ روم‘ قرار دیا تھا۔ یہ مقام صدیوں تک وینس کی سیاسی اور مذہبی قیادت کا مرکز رہا ۔ اور آج سیاحوں کا مرکزِ نگاہ ہے۔ یہاں سینکڑوں سال پرانا گرجا، سرکاری محل، سرکاری دفاتر اور کچھ انتہائی اعلیٰ معیار کے ریسٹورینٹ ہیں جو آج کل مرجعِ خلائق بنے ہیں۔ یہاں وینس کے مشہور ترین گرجا کے ایک طرف وینس کے

۱۷۲۰ ؑ میں بنائی گئی کانالیٹو کی قدیم سان مارکو پیازا کی پینٹنگ

حکمرانوں کا قدیم محل ہے اور دوسری طرف سرکاری عمال کے خوبصورت دفاتر ۔ ایک طویل عرصے تک وینس اور مقبوضہ علاقوں پر یہیں سے حکمرانی کی گئی۔

سان مارکو پیازا، مرکزی کینال سے متصل ہے اور (L) طرز پر بنا ہوا ہے۔ پیازا میں داخل ہونے کے بعد اس کی خوبصورتی اور وسعت نے ہمیں مسحور کر دیا۔ یہاں مختلف عمارتیں ، مختلف زمانوں میں بنیں اور ان کے طرزِ تعمیر میں اس امر کی جھلک ملتی ہے۔ ان عمارتوں پر بنے صدیوں پرانے نقش و نگار، اور مجسموں کی نفاست آج بھی سیاحوں کو ششدر کر دیتی ہے۔ اور عمارتوں کی دیکھ بھال کا اعلیٰ معیار دیکھ کر پاکستانی سیاحوں کے دل احساسِ کمتری سے بھر جاتے ہیں۔

ایک زمانے میں سان مارکو پیازا کبوتروں کی آماجگاہ ہوا کرتا تھا۔ دنیا بھر کے سیاح ان کبوتروں کو دانہ کھلایا کرتے تھے۔ اس کا نتیجہ یہ ہوا کہ پیازا میں ہر طرف کبوتروں کی بھرمار ہو گئی۔ اور پیازا کی صفائی مشکل ہو گئی۔ اب بھی یہاں بہت سے کبوتر ہیں۔ لیکن اب قانونی طور پر کبوتروں کھانا ڈالنا منع ہے۔ سیاحوں کو احتیاط کرنا چاہئے کیونکہ اس پر بھاری جرمانہ ہو سکتا ہے۔

باسلیکا ڈی سان مارکو

باسلیکا ڈی سان مارکو (Saint Mark’s Basilica) صرف وینس ہی نہیں بلکہ دنیا کےمشہور ترین گرجا گھروں میں سے ایک ہے۔ باسلیکا ، گرجا کا خصوصی درجہ ہوتا ہے جس کی منظوری پاپائے روم دیتا ہے۔ اکثر باسلیکا صرف عبادت گاہ ہی نہیں ہوتے بلکہ ان میں زیارات بھی ہوتی ہیں۔ یہ باسلیکا بھی سینٹ مارک کی باقیات پر بنایا گیا ہے۔ اس کی کہانی کچھ یوں ہے کہ وینس کے دو تاجر سنہ 828 ؑ میں الیگزینڈریا، یونان سے سینٹ مارک کی باقیات کو چرا کر وینس کے لئے روانہ ہوئے۔ راستے میں مسلمان علاقوں میں تلاشی سے بچنے کے لئے سینٹ مارک کی لاش کو خنزیر کے گوشت کے ڈھیر میں چھپا کر لائے کیونکہ مسلمان خنزیر کے گوشت کو چھونے یا اس کی تلاشی لینے سے اجتناب کرتے تھے۔سینٹ مارک کی باقیات یہاں پہنچنے کے بعد باسیلیکا کی تعمیر شروع ہوئی اور سنہ 832 ؑ میں اس کی پہلی عمارت مکمل ہوئی۔

ابتدا میں یہ ایک عارضی عمارت تھی جس میں ڈوجے محل کے افراد ہی عبادت کرتے تھے ۔ سنہ 1807 ؑ تک اس کی حیثیت سرکاری چرچ کی ہی رہی لیکن بعد میں نپولین کے حکم پر اسے شہر کے کیتھیڈرل کا درجہ دے دیا گیا۔ باسلیکا کی عمارت کئی مرتبہ تباہ ہوئی۔ موجودہ عمارت کی تعمیر سنہ 1063 – 94 ؑکے درمیان ہوئی اور بعد میں اس کی تزئین اور توسیع کا کام جاری رہا۔ باسلیکا کی آرائش کے لئے دوسرے شہروں اور ملکوں میں لُوٹ مار بھی کی گئی۔ اور ہر نادر شے کو، چاہے اس کا تعلق عیسائیت سے بنتا ہو یا نہیں، باسلیکا پہنچا دیا گیا[7]۔ اس کی سب سے بڑی مثالیں چار گھوڑوں کے مجسمے (Quadriga) اور (Tetrarchs )کے مجسمے ہیں۔

اگرچہ وینس کے لوگ کٹر عیسائی تھے اور اپنے آپ کو عیسائیت کے نمائندہ کے طور پر پیش کرتے تھے۔ لیکن وہ کلیسائے روم کی شاخ ہوتے ہوئے بھی ان سے قدرے مختلف تھے۔ کلیسائے روم طویل عرصے تک سیاست اور امورِ سلطنت پر حاوی رہا اور آج بھی اس کے اثرات ختم نہیں ہوئے۔ لیکن وینس نے شروع سے ہی جمہوریت کا راستہ چنا اور مذہبیت پر اپنی گرفت قائم رکھی۔ گرجا کے اجلاس کے لئے حاکم وینس کی اجازت لازمی تھی۔ بڑے پادری کا تقرر سینیٹ کے ذریعے ہوتا۔ بقیہ پادریوں کا انتخاب کلیسائے وینس کے ارکان، ووٹنگ کے ذریعے کرتے۔ اور ان پادریوں کے لئے وینس کا پیدائشی شہری ہونا بنیادی شرط تھی۔ ان تمام اقدامات کی وجہ سے وینس کے شہری کلیسائے روم کے ظلم و ستم سے محفوظ رہ کر ملکی ترقی میں حصہ لینے کے لئے یکسو ہو سکے۔

باسیلیکا میں ایک مذہبی تقریب - 1496 میں بنی جنٹیلی بینیلی کی تصویر

سینٹ مارک باسلیکا مشرقی اور مغربی طرزِ تعمیر کا حسین امتزاج ہے۔ اس میں اک طرف بازنطینی طرز تعمیر کی جھلک ملتی ہے تو دوسری طرف یونانی اثرات نظر آتے ہیں۔ یہ گرجا ، وینس کے زمانہ عروج کی دولتمندی کی ایک بڑی مثال ہے۔ جب آپ پہلی دفعہ گرجا میں داخل ہوں تو اس کا شاندار موزیک آپ کی آنکھیں خیرہ کر دے گا۔ اسے ترک قالین کی شکل کا بنانے کے لئے اس میں سنگِ مر مر اور شیشے کے چھوٹے، چھوٹے ٹکڑوں کو پھولوں، جانوروں اور جیومیٹرک شکلوں میں ترتیب دیا گیا ہے۔ اعلیٰ معیار کو حاصل کرنے کے لئے اس میں شمالی افریقہ سے لایا ہوا نایاب سنگِ مرمر استعمال کیا گیا ہے۔ یہ صرف نقطہ آغاز ہے۔ جب آپ اس شاندار گرجا میں داخل ہوں تو اپنے آپ کو تاریخ کے دھاروں میں بہنے کے لئے آزاد چھوڑ دیں۔ سمے کی پابندیوں کو بھول جائیں۔ قطار اندر قطار سجے تاریخ کے ابواب میں گم ہو جائیں اور اس کے قیمتی نوادرات کی مدح سرائی کرتے جائیں۔

سینٹ مارک باسلیکا کے گھوڑے

سینٹ مارک باسلیکا کے باہر چار گھوڑوں (Quadriga) کے عظیم الشان مجسمے آویزاں ہیں۔ لیکن ان خوبصورت مجسموں کے پیچھے ایک بدصورت تاریخ چھپی ہے۔ چوتھی صدی قبلِ مسیح میں قدیم یونان سے تعلق رکھنے والے عظیم مجسمہ ساز لِسی پَس (Lysippos) نے یہ شاہکار مجسمے تخلیق کئے ۔ ان مجسموں میں جزئیا ت نگاری اپنے عروج پہ نظر آتی ہے۔ گھوڑوں کے دوڑنے کا انداز، ان کے تنے ہوئے عضلات، پھولی ہوئی رگیں، ایک دوسرے کی طرف دیکھتے ہوئے گردن کے زاوئیے، ہر طرح سے کمالِ فن کی مثال ہیں۔

باسلیکا کے باہر نصب Quadriga کی نقل

ان کی تکمیل کے بعد کی زیادہ تاریخ نہیں ملتی لیکن ایک خیال یہ ہے کہ یونانی سلطنت کے زوال کے بعد عیسائی افواج انہیں لُوٹ کر بازنطینی دارالحکومت قسطنطنیہ لے گئیں۔ 1204 ء میں چوتھی صلیبی جنگ میں وینس کی افواج نے ، جو یروشلم کو “آزاد “کرانے نکلی تھیں، قسطنطنیہ پر حملہ کر دیا اور دیگر قیمتی اشیاء کے ساتھ یہ مجسمے بھی لُوٹ کر لے گئے۔ یہ مجسمے تقریباً 500 سال تک یہاں رہے حتٰی کہ نپولین بونا پارٹ ا نہیں چھین کر پیرس لے گیا۔ نپولین نے اپنے دور ِ اقتدار میں پورے یورپ سے فن پارے لوٹ کر پیرس منتقل کئے۔ وہ اپنی فوج کے ساتھ تاریخی نوادرات کے ماہرین بھی رکھتا تھا جو اس کے لئے مفتوحہ ممالک کے نوادرات پرکھتے اور پیرس منتقل کرنے کے منتخب کرتے۔ نپولین ان نوادرات کو اپنی فتوحات کی یادگار کے لئے بنائے گئے

سینٹ مارک باسلیکا میوزیم میں رکھے گئے گھوڑوں کے اصل مجسمے

میوزم میں رکھتا ۔ اس کی خواہش تھی کہ پیرس میں نوادرات کا اتنا بڑا ذخیرہ ہو جائے کہ وہ روم کے بجائے یورپ کا ثقافتی دارالحکومت بن جائے۔ نپولین کی ہوس نے لوور (Louver) عجائب گھر کو دنیا بھر کے لوٹے ہوئے نوادرات سے بھر دیا۔ اس نے سینٹ مارک باسلیکا سے لُوٹے ہوئے گھوڑوں کے مجسمے اور رتھ (Chariot) ، پیرس کے بابِ فتح (Arc de Triomphe) پر نصب کروا دئیے۔

1815ء میں نپولین کو شکست دینے کے بعد انگریز کیپٹن ڈومیریسکوک ان مجسموں کو واپس وینس لے گیا، جہاں یہ مجسمے باسلیکا کے باہر پہلی منزل پر نصب کر دئیے گئے۔ 1980ء تک یہ مجسمے وہیں رہے لیکن پھر فضائی آلودگی سے ہونے والے نقصانات سے بچانے کے لئے اصل مجسمے باسلیکا کے اندر دوسر ی منزل پر منتقل کر دئیے گئے اور باہر ان مجسموں کی نقل نصب کر دی گئیں۔

پلازو ڈُکالے

سان مارکوباسلیکا کے سامنے ڈوجے کا محل (Palazzo Ducale) ہے۔ ڈوجے کو انگلش میں ڈیوک (Duke) اور اردو میں نواب کہا جا سکتا ہے۔ لیکن ڈوجے کو وینس کے امراء کی جماعت منتخب کرتی تھی اور وہ اس عہدے پر تا عمر فائز رہتا۔ یہ انتظام 726ء سے 1797ء کے درمیان چلتا رہا۔

پہلی بار جب وینس میں جمہوری ریاست کی بنیاد پڑی تو ڈوجے آف وینس کے لئے نویں صدی کے آغاز میں ڈوجے اگنیلو پارٹیسیپازیو نے یہ محل تعمیر کروایا۔ دسویں صدی کے دوران شدید آگ لگنے کے بعد ڈوجے سبسٹیانو زیانی نے اس محل کی دوبارہ تزئین و آرائش کی۔ اب پتھر اور اینٹوں کے کام کے علاوہ اس ڈھانچے کے بہت کم نشانات باقی ہیں۔

پلازو ڈوکالے کا اندرونی منظر

بارہویں اور تیرہویں صدی کے دوران وینس کی معیشت مضبوط ہوئی۔ یہ شہر ایشیا اور یورپ کے درمیان تجارتی منڈی کے طور پر ابھرا۔ جیسے جیسے اس کی تجارت میں اضافہ ہوتا گیا اس کی فوجی قوت بھی بڑھتی گئی۔ اور جوں جوں اس کی فوجی قوت بڑھتی گئی اس کی معیشت بھی مضبوط تر ہوتی گئی۔ لہٰذا ڈوجے کے حکم پر 1340ءمیں نئے محل کی تعمیر شروع ہوئی ۔

ڈوجے کے محل کے بیرونی حصے پر جس طرح کے جیومیٹرک ڈیزائن ہیں وہ فنِ تعمیر کا انوکھا امتزاج ہے، جسے بآسانی اسلامی گوتھک طرزِ تعمیر کہا جا سکتا ہے[8]۔ 1400ء کی دہائی کے دوران اس میں مزید توسیع کی گئی ۔ اگلی چند صدیوں کے دوران کئی مرتبہ اس محل میں آگ لگی جس نے محل کے کئی حصوں کو تباہ کر دیا۔ لیکن ہر بار اس محل کی تزئین و آرائش کی گئی اور تعمیر نو کے کام میں اس کے اصل گوتھک انداز کو برقرار کھا گیا۔

صدیوں کی سیاسی اتھل پتھل کے بعد وینس کچھ عرصے کے لئےفرانس کے قبضے میں رہا۔ 1866ء میں وینس معہ ڈوجے کےمحل ، اٹلی کا حصہ بن گیا۔ 1923ء میں اسے ریاست کے حوالے کر دیا گیا اور 1996ء میں یہ وینس کے عجائب گھروں کا حصہ بن گیا۔

سِسکیوں کا پل

ڈوجے کے محل کی دوسری منزل کو ایک پل (Ponte di Sospiri) ، جس کے نام کا مطلب سِسکیوں کا پل بنتا ہے، نہر کے پار (Ca' dei Dogi) سے ملاتا ہے۔ ایک روایت ہے کہ جب ڈوجے محل میں قید خانے چھوٹے پڑنے لگے تو برابر کی عمارت میں نئے قید خانے بنائے گئے۔ یہ قید خانے عمر قید کے سزاواروں کے لئے استعمال ہوتے تھے۔ جب ڈوجے محل سے قیدیوں کو نئے قید خانوں میں لے جایا جاتا تو وہ آخری بار اس پل کی جالیوں سے وینس کے سمندر کو دیکھ پاتے اور پھر بقیہ عمر تعذیر خانوں میں گذار دیتے۔ کچھ مؤرخوں کے مطابق یہ ایک فرضی روایت ہے۔ واللّٰہ اعلم بالصّواب۔

سان مارکو کا گھنٹہ گھر

وینس کی سب سے اونچی عمارت سان مارکو کا گھنٹہ گھر (San Marco Campanile) ہے۔ اس کی تعمیر 932 ؑ میں شروع ہوئی۔ لیکن اس کی موجودہ صورت کو پہنچنے میں صدیاں لگ گئیں۔ شروع میں اس مینار کا مقصد بحری راستوں پر نظر رکھنا تھا تاکہ بیرونی حملہ آوروں کے مقابلے کی بر وقت تیاری کی جا سکے۔ وقتاً فوقتاً اس کی بلندی بڑھائی جاتی رہی اور اب یہ 98.6 میٹر اونچا ہے۔ بارہویں صدی میں پہلی بار اس میں گھنٹیاں نصب کی گئیں۔ سولہویں صدی میں اس مینار کے اوپر جبرئیل کا مجسمہ نصب کیا گیا جس پر اب سونے کا پانی چڑھا ہوا ہے۔ سترہویں صدی میں اس ہی مینار پر گیلیلیو گیلیلی نے اپنی دوربین کا مظاہرہ کیا تھا۔ جس کے تین دن بعد وہ دوربین اس وقت کے حاکم ڈوجے لیونارڈو - ڈوناٹو کی نذر کر دی گئی۔

اس مینار پر کم از کم پانچ گھنٹیاں نصب تھی جو کہ الگ، الگ مواقع پر بجائی جاتی تھیں۔ سب سے بڑی گھنٹی (Marangona) طلوع اور غروب آفتاب پر بجائی جاتی تھی۔ (Trottiera) بجنے کا مطلب ارکانِ حکومت کو فوری طور پر چیمبر میں پہنچنے کا اشارہ تھا۔ (Nona) دن کے درمیان میں بجائی جاتی تھی۔ (Mezza Terza) بجانے کا مطلب سینیٹ کے اجلاس کا اعلان تھا۔ اور سب سے چھوٹی گھنٹی (Maleficio) اس وقت بجائی جاتی تھی جب کسی کی سزائے موت پر عملدرآمد ہو رہا ہو۔

سان مارکو گھنٹہ گھر سے شہر اور سمندر کا نظارہ

سان مارکو پر اچھا خاصا وقت گزارنے کے بعد وہیں پر بنے آثار قدیمہ کے عجائب گھر (Museo Archeologico) کے سامنے بنے باغ (Giardini Reali) میں بیٹھ گئے۔ اس باغ میں داخلہ مفت ہے اور یہاں بہت ساری بنچ لگی ہوئی ہیں۔ اچھا خاصا گھومنے پھرنے کے بعد اس باغ میں بیٹھنا بہت فرحت انگیز لگا۔ اندازہ ہوا کہ گرم موسم میں بھی درختوں سے ڈھکے باغ میں درجہ حرارت کتنا خوشگوار ہوتا ہے۔ وہاں تھوڑا سا آرام کیا۔ کچھ تصویریں بنائیں۔ گوگل پر ایسا حلال ریسٹورینٹ ڈھونڈا جو کہ ’پیازالے روما ‘کے راستے میں ہو اور وہ راستہ اکیڈیمیا پل سے ہو کر جاتا ہو۔ اور پھر کھانا کھانے نکل پڑے۔

فنکاروں کا پل

نہرِ عظیم پر آخری پل اکیڈیمیا (Ponte Dell’Accademia) ہے۔ پہلی بار اس پل کا خیال 1488 ؑ میں پیش کیا گیا لیکن کونسل نے اس قرارداد پر ووٹنگ کی زحمت بھی نہیں کی اور مذاق اڑاتے ہوئے اس خیال کو رد کردیا۔ پھر تقریباً چار سو سال بعد 1854 ؑ میں یہاں ایک لوہے کا پل بنایا گیا۔ 1933 ؑ میں لوہے کا پل کو توڑ کر ایک اور پل بنایا گیا۔ زیادہ تر لوگوں کو امید تھی کہ فیروویا اور ریالٹو کی طرح یہاں بھی ماربل کا پل بنے گا ۔ لیکن توقعات کے برعکس یہاں لکڑی کا پل بنایا گیا جو کہ اسے بقیہ تین پلوں سے منفرد بناتا ہے۔ آج بھی اس پل پر قدم رکھتے ہی سیاح اپنے آپ کو صدیوں پرانے وینس میں محسوس کرنے لگتا ہے۔ اس پل کے سامنے وینس کی مشہور مصوروں اور مجسمہ سازوں کی اکیڈمی ہے جس کے نام پر اس پل کا نام رکھا گیا۔

دِلوں کے تالے

وینس کے پلوں اور تالوں کا بہت پرانا رشتہ ہے۔ ایک روایت کے مطابق جوڑے، خاندان، دوستوں کا گروپ ایک تالے پر اپنے نام لکھتے ہیں۔ انہیں اپنے پسندیدہ پل پر لٹکا دیتے ہیں۔ اور چابی یا تو دریا میں پھینک دیتے ہیں یا اپنے پاس محفوظ کر لیتے ہیں۔ ان کے خیال میں جب تک یہ تالے لگے ہوئے ہیں ان کی محبت ’لاک‘ رہے گی یعنی قائم رہے گی۔ ویسے تو یہ تالے وینس کے ہر اس پل پر لگے ہوتے ہیں جہاں تالا لگانا ممکن ہو۔ لیکن نہرِ عظیم کے چاروں پل اس کام کے لئے سیاحوں کی اولین پسند ہیں۔ سیاحوں کا شوق اپنی جگہ لیکن انتظامیہ کو یہ تالے زیادہ اچھے نہیں لگتے ۔ ان کے خیال میں ان سے پل پر اضافی بوجھ پڑتا ہے۔ اور پل پر زنگ لگنے کے امکانات بڑھ جاتے ہیں۔ لہٰذا وقتاً فوقتاً ان تالوں کو ہٹانے کا کام جاری رہتا ہے۔ سیاح خبردار رہیں۔ شاید ان کی محبت اتنی پائیدار نہ ہو جتنی وہ سمجھ رہے ہوں۔

اکیڈیمیا پل دیکھنے کے بعد ہم کھانا کھانے سان ماریا گرجے کے علاقے کی طرف چلے گئے۔ وینس میں ریسٹورینٹس، کیفے، اور کھانے پینے کی بے شمار دکانیں ہیں۔ ان میں مقامی سے لے کر بین الاقو امی برانڈ شامل ہیں جہاں کم از کم 5€ سے لے کر سینکڑوں € تک کے کھانے مل سکتے ہیں۔ ریسٹورینٹ کے بل میں عموماً سروس چارجز شامل ہوتے ہیں جو 10 سے 20 فیصد کے درمیان ہوتے ہیں۔ شہر میں اچھے خاصے حلال ریسٹورینٹ بھی موجود ہیں جہاں اطالوی اور ترکیہ انداز کے کھانے مل جاتے ہیں۔

ہم ایک حلال Take away کو چھوڑ کر Bar ae Maraveje کو حلال ریسٹورینٹ سمجھ کر کھانا کھانے چلے گئے۔ وہاں ایک بنگالی لڑکے نے ہمیں یقین دلایا کہ وہ ہمارے لئے خصوصی طور پر حلال کھانا بنائے گا۔ بس تھوڑی سی گڑبڑ یہ ہوئی کہ ہم نے چکن اور پیپرونی سے بھرپور مہنگے پیزا منگوائے ۔ اور ان صاحب نے گوشت کو مختلف قسم کی سبزیوں سے بدل کر پیزا بنا دیئے۔ لیکن ماننا پڑے گا کہ اطالوی انداز کے پیزا بہت مزے دار تھے۔ ان صاحب نے ہم سے پیسے تو چکن اور پیپرونی پیزا ہی کے لئے لیکن اس کی تلافی وہاں کے صاف ستھرے ماحول اور با اخلاق اسٹاف کی عمدہ سروس سے ہو گئی۔

کھانے کے بعد ہم نے دوبارہ پیازالے روما کا رخ کیا جہاں سے ہمیں ائرپورٹ کے لئے بس ملنی تھی۔ راستے میں مختلف گرجا، خوبصورت مکانات دیکھتے، میدانوں میں لگی بنچوں پر بیٹھ کر مقامیوں اور سیاحوں کا مشاہدہ کرتے آہستہ، آہستہ بس اسٹاپ کی جانب بڑھتے رہے۔ راستے میں خیال آیا کہ اٹلی آئے اور جیلاٹو نہیں کھائی۔ لہٰذا یہ کام بھی پورا کیا۔ ایک دکان سے اٹلی کی کچھ سوغاتیں خریدیں۔ وہاں ایک بنگالی صاحب بیٹھے تھے جن سے اچھی گفتگو ہو گئی۔ انہوں نے بغیر کہے ہی قیمت میں تقریباً 30 فیصد رعائت بھی کر دی۔ لیکن اصل بات جو انہوں نے بتائی وہ خاصی دلچسپ تھی۔ میں نے وینس میں مسجد کے بارے میں پوچھا تو کہنے لگے کہ یہاں 6 سے زیادہ مساجد ہیں۔ میں نے تھوڑا سا اور کریدا ’ کیا اس جزیرے پر؟‘ بولے اس جزیرے پر کوئی مسجد نہیں ہے۔ ساری مساجد ماسترے اور اس سے ملحق علاقوں میں ہیں۔ تو جناب جزیرہ وینس جہاں ہر چند گلیوں کے بعد ایک گرجا بنا ہوا ہے، یہودی گھیٹوز (Ghettos) میں یہودی عبادت گاہیں ہیں لیکن ایک بھی مسجد نہیں ہے۔ چلیں کوئی بات نہیں۔ ہمارے لئے تو ساری زمین ہی مسجد ہے۔ کہیں بھی نماز پڑھ لیں گے۔

ہر تمنّائے سکونِ ساحل - الجھی الجھی رہی سیلابوں میں [9]

ہم بہت تھوڑے وقت کے لئے وینس گئے تھے۔ یہ شہر تھوڑا سا دیکھا۔ اور بہت سارا نہیں دیکھا۔ جو نہیں دیکھا اسے دیکھنے کی ہوس ہے سوائے (Aqua Alta) کے۔ نام سے بظاہر بہت خوبصورت لگنے والی چیز دراصل وینس میں وقتاً فوقتاً آنے والے سیلاب ہیں۔ Aqua پانی کو کہتے ہیں اور Alta بلندی کو۔ وینس اس وقت سطحِ سمندر سے نیچے جا چکا ہے۔ اس شہر کو ڈوبنے سے بچانے کے لئے چاروں طرف مختلف طرح کی رکاوٹیں بنائی جار ہی ہیں تاکہ شہر میں پانی کی سطح قابو میں رہے۔ لیکن اس کے باوجود بھی تیز بارشوں اور سمندر چڑھنے کے صورت میں یہ شہر کئی فیٹ پانی میں ڈوب جاتا ہے۔ شہر کی عمارتیں اس کی گواہ ہیں ۔ بیشتر عمارتوں میں نچلے تین فیٹ تک پلاستر ادھڑا ہوا ملتا ہے جبکہ اس سے اوپر بہت عمدہ پلاستر اور رنگ ہوا ہوتا ہے۔ اس کی بنیادی وجہ پانی کا کھڑا رہنا ہے۔ اس شہر کی سیاحت کی منصوبہ بندی کرتے ہوئے سیاحوں کی تعداد کو ذہن میں رکھنا تو ضروری ہے ہی لیکن اتنا ہی ضروری صحیح موسم میں وینس آنا بھی ہے۔ ورنہ بغیر کشتیوں کے پورے وینس میں تیرتے پھریں گے۔

وینس کی شام

کہتے ہیں کہ وینس کو کم از کم دو مرتبہ دیکھنا چاہئے۔ ایک بار دن میں اور ایک دفعہ رات میں۔ رات میں یہ شہر ایک الگ ہی روپ دکھاتا ہے۔ دن میں جو سیاح فہرستیں ہاتھ میں لئے ایک تاریخی مقام سے دوسرے تاریخی مقام کی طرف بھاگ رہے ہوتے ہیں، شام کو نہا دھو کر ، تازہ دم ہو کر کیفے، ریستوران اور مے خانوں میں سکون سے بیٹھے ہوتے ہیں۔ کہیں مقامی موسیقار دھنیں بجا رہے ہوتے ہیں۔ تو کہیں میوزک سسٹم پر مقامی دھنیں بج رہی ہوتی ہیں۔ اندرونی گلیاں سرکاری کھمبوں پر لگے بلبوں سے روشن ہوتی ہیں۔ گھروں کی کھڑکیوں کے رنگین شیشوں سے چھنتی روشنی گلیوں میں خوبصورت نقش و نگار بنا رہی ہوتی ہے۔ چھوٹی نہروں پر قطار در قطار کشتیاں ’پارک‘ ہوئی ہوتی ہیں۔ اور نہروں کو خالی پا کر بطخیں اپنا شوقِ تیراکی پورا کرنے آ جاتی ہیں۔ نسبتاً بڑی نہروں میں اہلِ دل اب بھی گنڈولا کی سواری سے لطف اندوز ہو رہے ہوتے ہیں اور نہروں پر پڑنے والی رنگ برنگ ،جھلملاتی روشنیوں سے مسحور ہو ئے جاتے ہیں۔ ایسے میں جب گنڈولا چلانے والا اپنی پاٹ دار آواز میں مقامی گیت گا رہا ہو تو ایک خوابناک تاثر سیاح کو اپنی گرفت میں لے لیتا ہے۔ یہ شہر دن میں اگر تاریخ کا ایک باب ہوتا ہے تو رات کو الف لیلۃ کی ایک حسین داستان بن جاتا ہے۔

خونِ غریباں

لیکن ذرا رکئے۔ وینس کی شام کے کچھ اور ساتھیوں کا ذکر ابھی باقی ہے۔ وینس حیرت انگیز طور پر صاف ستھرا شہر ہے۔ ستھری گلیاں، صاف نہریں، قدیم طرز پر بنی خوبصورت دکانیں اور ریسٹورینٹس۔ مقامیوں کا معاملہ تو سمجھ آتا ہے لیکن لاکھوں سیاحوں کی صفائی پسندی انتہائی حیرت انگیز ہے۔ ہمیں اپنے پورے قیام میں دن کے وقت کوئی صفائی کرنے والا نظر نہیں آیا لیکن پھر بھی کسی گلی میں کوڑا پھیلا ہوا نہیں ملا۔ اس معاملے میں تو لندن بھی وینس کے قریب نہیں پھٹکتا۔

لیکن ۔۔۔۔ اس صفائی کے باوجود بھی جس ریسٹورینٹس میں کھانا کھایا، اکّا دکّا مکھیاں ضرور نظر آئیں۔ اور اس سے بھی زیادہ خوفناک تجربہ مچھروں کے ساتھ ہوا۔ وینس کا حسن رات میں دوبالا ہو جاتا ہے۔ سو ہم بھی اس سے لطف اندوز ہونے پہنچ گئے۔ لیکن جناب وہاں جو مچھروں نے یلغار کی تو آج واپس آنے کے ایک ہفتے بعد بھی ہاتھوں اور گردن پر بنے دانوں کو کھجا رہے ہیں۔ وہاں بلدیہ کی طرف سے خودکار ’دھُونی‘ دینے کے انتظامات ہیں لیکن جہاں دھوئیں کا اثر نہیں پہنچتا وہاں مچھروں کے غول آپ کے سواگت کو موجود ہوتے ہیں۔

بہرحال مچھروں کے گارڈ آف آنر کو خندہ پیشانی سے برداشت کرتے ہوئے بس اسٹاپ پر پہنچے۔ ائرپورٹ کی بس لی اور 15 منٹس میں ائرپورٹ پہنچ گئے۔ ائرپورٹ پر کل والا جہاز ، کل والے عملے کے ساتھ موجود تھا۔ ایک بار پھر W11 جیسی نشستوں والے جہاز میں سوار ہوئے جس میں نشستیں پیچھے جھکانے کا نظام لگا ہی نہ تھا ۔ دو گھنٹے کمر سیدھی رکھنے کی ورزش کرنے کے بعد گیٹ وک ائرپورٹ پہنچ گئے۔ آگے زندگی میں سکون تھا، بہت سی خوبصورت یادیں اور کچھ یادگار تصویریں۔

وینس کے عروج کی داستان [10]

وینس کی سیاسی حکمرانی کے سفر کا آغاز بازنطینی سلطنت کے مقرر کردہ ڈوجے سے ہوا۔ لیکن ایک طویل عرصے کے بعد پہلا مقامی ڈوجے منتخب کیا گیا جو بازنطینی سلطنت کے اثر سے نکلنے کا نعرہ دے کر کامیاب ہوا تھا۔ لیکن اس طرح بازنطینی مخالف اور بازنطینی نواز گروہوں میں ایک طویل جنگ کا آغاز ہو گیا۔ اگرچہ ریاست کے اندر خانہ جنگی کی کیفیت تھی لیکن مقامی تاجروں نے اپنے کاروبار کو ترقی دینے کا عمل جاری رکھا جس سے ریاست کی خوشحالی میں اضافہ ہوتا رہا۔ 1032 ؑ میں پہلی بار ڈوجے کا عوامی انتخاب ہوا اور اس میں ڈوجے کے انتخاب میں با اثر خاندانوں کی بالادستی کا خاتمہ ہوا۔ ڈوجے کے اختیارات محدود کئے گئے اور جمہوری اقدار کو فروغ ملا۔ اس کی تفصیل یہ ہے کہ ڈوجے کا انتخاب امراء کی کونسل کے ذریعے ہوتا تھا اور وہ تمام عمر کے لئے منتخب ہوتا تھا۔ جبکہ سینیٹ کے ارکان کی مدت انتخاب معیّن نہیں ہوتی تھی ۔ ڈوجے اپنی حاکمیت اعلیٰ کے باوجود وینس کی سینیٹ کے کنٹرول میں ہوتا تھا۔ اس کے خطوط سینسر کئے جاتے تھے۔ وہ کسی غیر ملکی وفد سے اکیلا ملنے کا مجاز نہیں تھا۔ اس طرح کی پابندیوں کا مقصد کسی طالع آزما ڈوجے کو جمہوریت کو نقصان پہنچانے سے روکنا تھا۔ لیکن اس کے علاوہ ڈوجے تمام کونسلز کی سربراہی کرتا اور تمام فیصلوں پر اثر انداز ہوتا۔ عام طور پر معمّر افراد ڈوجے کا انتخاب لڑتے تھے۔ اس وجہ سے ڈوجے کو نہ صرف اپنے عہدے کی وجہ سے معاشرے میں عزت کی نگاہ سے دیکھا جاتا بلکہ اپنے تجربے اور فراست کی وجہ سے بھی اس کی قدر کی جاتی تھی۔

اس زمانے میں بازنطینی سلطنت اور کلیسائے روم میں یورپ پر غلبے کی جنگ جاری تھی۔ وینس نے اپنے کاروباری مفادات کو سامنے رکھا اور بڑی کامیابی سے اپنے آپ کو ایک فریق بننے سے بچایا۔ اس طرح اسے ان دونوں طاقتوں کے درمیان ایک منڈی کا درجہ مل گیا جہاں دونوں اطراف کے ممالک آ کر تجارت کر سکتے تھے۔ اس سے حاصل ہونے والے منافع سے وینس نے کاروباری اداروں کو فروغ دیا اور ان کی حفاظت کے لئے بحری قوت میں مسلسل اضافہ کرنا شروع کردیا۔

گیارہویں صدی میں وینس نے اپنی بحری طاقت کا مظاہرہ کیا جب اس نے بازنطینی سلطنت اور نارمن قبائل کی جنگ میں بازنطینیوں کا ساتھ دیا اور بحیرہ روم میں نارمن قبائل کو شکست دی۔ اس کے بدلے میں بازنطینی سلطنت نے وینس کو اپنے علاقوں میں بغیر کسٹم محصولوں کے آزادانہ تجارت کی اجازت دے دی۔ اس طرح وینس کا بحیرہ روم پر غلبہ اور کاروبار بہت وسیع ہو گیا۔ اگرچہ یہ وینس کے لئے نعمت غیر مترقبہ سے کم نہ تھا لیکن انہوں نے بازنطینی بادشاہ کو ناراض کرنے میں زیادہ دیر نہیں لگائی۔ بازنطینی بادشاہ ایمانوئیل اوّل کے خیال میں وینس کے تاجر مغرور اور گھمنڈی تھے۔ اور کاروبار میں قانون شکنی کا ارتکاب بھی کرتے تھے۔ اس کے علاوہ اسے یہ بھی خطرہ تھا کہ وینس کے اعلیٰ درجے کے کاروباری ادارے ، بازنطینی سوداگروں کو کاروبار سے باہر نہ کر دیں۔ اس لئے اس نے وینس کے مقابلے میں اطالوی علاقوں جینوآ (Genoa) اور پیسا (Pisa) کے تاجروں کی حوصلہ افزائی شروع کر دی۔ یہ بات وینس کے تجار کو پسند نہ آئی اور انہوں نے مخالف تاجروں کے اداروں کو تباہ کرنا شروع کر دیا۔ جواباً ایمانوئیل نے 1171 ؑ میں بازنطینی سلطنت میں موجود وینس کے تمام شہریوں کو گرفتار کرنے کا حکم دے دیا اور ان کا تمام سامانِ تجارت ضبط کر لیا۔ اگرچہ اگلی دو دہائیوں میں بظاہر تعلقات بحال ہو گئے لیکن اہلیانِ وینس کے دل سے تلخی دور نہیں ہوئی۔

ان تمام ادوار میں اہلیانِ وینس تجارت پر اپنی توجہ مرکوز کئے رہے۔ یورپ کی مشہور تجارتی بندرگاہوں پر ان کی کاروباری بالادستی مسلّم ہو گئی تھی۔ وینس کے تاجراپنے کاروبار کو بڑھانے کے لئے جدید طریقے استعمال کرتے تھے۔ اس زمانے میں یورپ میں رومن ہندسوں کا رواج تھا جو کہ بڑے حساب کتاب کے لئے ناموزوں تھے۔ وینس نے بہی کھاتوں میں عربی اعداد کا استعمال شروع کیا جن میں جمع تفریق نہایت آسان تھی۔ (ذرا رومن اعداد میں MCVI + XCIV جمع کر کے دیکھیں)۔ وینس کے ایک راہب لُوچا پیچیولی (Luca Pacioli) نے پہلی دفعہ ڈبل انٹری اکاؤنٹنگ کا تصور پیش کیا۔ جس کی وجہ سے وینس کے تجار انتہائی درستی کے ساتھ کاروبار کے حساب رکھنے کے قابل ہو سکے۔ آج 800 سال بعد بھی ڈبل انٹری نظام جدید اکاؤنٹنگ کی بنیاد بنا ہوا ہے۔

تجارت کے علاوہ وینس کی دیگر مصنوعات بھی شہرت پانے لگیں۔ یہاں کی شیشہ گری پوری دنیا میں مشہور ہو گئی۔ دراصل وینس کے جزیرے سے تمام شیشہ گروں کو نزدیکی جزیرے مُرانو (Murano) منتقل کر دیا گیا۔ جس کے بعد یہ جزیرہ شیشہ گری کا مرکز بن گیا۔ یہاں کی بنی ہوئی مصنوعات یورپ اور دنیا بھر کے امراء اور سلاطین استعمال کرنے لگے۔ آج بھی Murano Glass کی اشیاء بہت مشہور ہیں اور مہنگے داموں فروخت ہوتی ہیں۔

تیرھویں صدی کے آغاز میں جب چوتھی صلیبی جنگیں شروع ہوئیں تو وینس کو بازنطینی سلطنت سے بدلہ لینے کا موقع مل گیا۔ وینس نے بازنطینی سلطنت پر حملے میں صلیبیوں کا ساتھ دیا۔ صدر مقام قسطنطنیہ پر قبضہ کر کے بادشاہ کو ملک بدر کر دیا اور صلیبیوں کے ساتھ سلطنت آپس میں بانٹ لی۔ اس کے نتیجے میں بحیرہ روم اور بحیرہ اسود کے علاقے میں وینس کی تجارت کو بے حد عروج ملا۔

1261 ؑ میں جلاوطن بازنطینی بادشاہ نے جینوآ کی ریاست کی مدد سے وینسیوں کو قسطنطنیہ سے مار بھگایا۔ اور اس کے صلے میں جینوآ کو بحیرہ اسود اور بحیرہ روم کے مشرقی علاقے میں تجارت کی آزادی دے دی۔ نتیجتاً وینس کی اس علاقے میں تجارتی اجارہ داری پر ضرب پڑی۔ اس بار وینس نے جنگ کے بجائے مذاکرات کا سہارا لیا اور بازنطینی سلطنت سے اس علاقے میں تجارتی مراعات حاصل کرنا شروع کر دیں۔ لیکن جب 1291 ؑ میں صلیبیوں کو مسلمانوں کے ہاتھوں شکست ہوئی تو بحیرہ روم کے مشرقی علاقے میں وینسیوں کی اجارہ داری ختم ہونے لگی اور وہ بحیرہ روم کے شمالی علاقوں میں اپنا اثر بڑھانے کی کوشش کرنے لگے۔ یہ علاقہ اس وقت جینوآ کے تجارتی اثر میں تھا۔ نتیجتاً اگلے دو سو سال تک جینوآ اور وینس میں جنگیں ہوتی رہیں۔ صرف یہی نہیں بلکہ وینس چند دوسری ریاستوں کے ساتھ مل کر ویرونا (Verona) کے خلاف زمینی لڑائی میں بھی شامل ہو گیا۔ لیکن ان طویل جنگوں، اور چودھویں صدی میں پھیلنے والی پلیگ کی وبا نے وینس کی معیشت کو کھوکھلا کر دیا۔ آخر کار وینس کا جینوآ کے ساتھ امن معاہدہ ہوا اور وینس کو بحیرہ روم اور مشرقی ممالک کے تجارتی راستوں پر اختیار حاصل ہو گیا۔

ان جنگوں کے خاتمے کے بعد وینس کو نیا لائحہ عمل بنانے کا موقع ملا۔ چونکہ مشرق میں ترک اپنا اثر بڑھا رہے تھے لہٰذا اس نے مغرب میں اٹلی کے کچھ علاقوں پر قبضہ کیا اور اس سمت اپنی تجارت کو فروغ دینا شروع کیا۔ اس وقت کے ڈوجے ٹوماسو موچنگو (Tommaso Mocenigo) نے فیصلہ کیا کہ اب مغرب کی طرف فوجی پیش قدمی روک دی جائے اور تجارت پر توجہ مرکوز رکھیں۔ یہ زمانہ وینس کے عروج کا زمانہ سمجھا جاتا ہے۔ لیکن موچنگو کے جانشین نے اس حکمت عملی سے اختلاف کیا اور اٹلی کی دوسری ریاستوں پر حملے شروع کر دئیے۔ یہ بہت بڑی غلطی تھی۔ وینس کو جلد ہی احساس ہو گیا کہ ان کی فوجی قوت اس قابل نہیں تھی کہ اٹلی کے زمینی علاقوں میں جنگ جیت سکے۔ لہٰذا چند ہزیمتوں کے بعد انہیں اٹلی کی ریاستوں سے جنگ بندی کرنی پڑی۔

پندرویں صدی کے وسط میں ترکوں نے قسطنطنیہ پر قبضہ کر لیا۔ اور اس کے چند برسوں بعد وینس کے زیر تسلط یوبویا (Euboea) پر قبضہ کر لیا۔ اس موقع پر وینس نے ترکوں سے امن معاہدے کر لئے تاکہ اگلی جنگوں سے بچا جا سکے۔ لیکن وہ جلد ہی اطالوی ریاست فرارا (Ferrara) سے ایک جنگ میں الجھ گئے۔

سولہویں صدی کے آغاز میں اٹلی کی ریاستوں کی باہمی چپقلشوں نے بیرون قوتوں کو شہہ دی کہ ان ریاستوں پر حملہ کر سکیں۔ 1508 ؑ میں کلیسائے روم، ہسپانوی، فرانسیسی، ہنگری اور فرارا کی ریاستوں نے مل کر ترکوں سے لڑنے کے لئے ایک فوج (League of Cambrai) ترتیب دی لیکن اس کے بجائے وینس پر حملہ کر دیا۔ حملہ آوروں کی باہمی چپقلش کی وجہ سے وینس اپنا شہر بچانے میں کامیاب ہو گیا لیکن اسے اٹلی میں اپنے زیر تسلط علاقوں سے ہاتھ دھونے پڑے۔ بری خبریں یہیں ختم نہیں ہوئیں۔ ترکی کی وجہ مشرقی علاقوں میں اس کا تجارتی تسلط ختم ہوگیا۔ مغرب میں نئے تجارتی راستوں کی دریافت سے یورپ کا وینس پر انحصار تقریباً ختم ہو گیا۔ بحر اوقیانوس کے کنارے والے ممالک کے لئے سمندر پار ایک نئی دنیا سے تجارت کے راستے کھلنے لگے۔ اس طرح وینس ،بحیرہ روم اور یورپ کی سپر پاور کی حیثیت کھونے لگا ۔ اگلی دو صدیوں میں وینس کے پاس اپنی سابقہ شان و شوکت کو قائم رکھنے کے بہت کم راستے بچے تھے۔ اسے نہ چاہتے ہوئے بھی وسطی اٹلی کے ساتھ مل کر کئی جنگوں کا حصہ بننا پڑا لیکن ان میں سے کوئی بھی اس کے لئے فائدہ مند ثابت نہ ہو سکی۔ معاشی مواقع کی کمی اور جنگی اخراجات میں اضافے نے ریاست کے اندرونی نظام کو کھوکھلا کرنا شروع کر دیا۔

ہر کمال کو زوال ہے

1796ء میں فرنچ ریپبلک نے انقلابی جنگوں کے سلسلے کو بڑھانے کے لئے نوجوان جنرل نپولین بوناپارٹ کو سلطنت آسٹریا سے مقابلے کے لئے بھیجا۔ نپولین نے اپنی افواج کو سلطنت وینس سے گزارنے کا فیصلہ کیا جو کہ ان جنگوں میں غیر جانبدار تھا۔ وینس اس وقت تک اپنی جنگی طاقت کھو چکا تھا اور اس قابل نہیں تھا کہ فرانس کی افواجِ قاہرہ کو انکار کر سکے۔ اس نے سوچا کہ شاید فرانس اور آسٹریا کی جنگ اسے آسٹریا کے اثر سے نکلنے میں مدد کر سکے۔

لیکن فرانس نے خفیہ طور پر وینس میں چلنے والی انقلابی تحریک (Society of the Jacobins,) کی مدد کرنا شروع کر دی۔ جواباً وینس کی سینیٹ نے بھی خاموشی سے جنگ کی تیاری شروع کر دی۔ وینس کی کمزور افواج انقلابیوں کا مقابلہ کرنے کے قابل نہ تھی۔ اور فرانس کی افواج کے مقابلے کا تو سوال ہی پیدا نہیں ہوتا تھا۔ مارچ 1797ء میں انقلابیوں نے عام انقلاب کا اعلان کر دیا لیکن عوام نے ان کے بجائے حکومت کا ساتھ دیا۔ اس پر فرانسیسی افواج کھل کر انقلابیوں کی مدد کو آ گئیں ۔ اپریل 1797ء میں نپولین نے وینس کو جنگ کی دھمکی دے دی۔ وینس کی سینیٹ نے مذاکرات کے ذریعے معاملے کو حل کرنے کی کوشش کی لیکن کامیاب نہ ہو سکی۔ آخرکار مئی 1797ء میں لوڈوویکو مینین (Ludovico Manin) نے آخری ڈوجے کی حیثیت سے اقتدار انقلابییوں کے حوالے کر دیا۔ اس طرح 1100 سال بعد جمہوریہ وینس کی آزادی کا خاتمہ ہو گیا۔

لیکن نپولین کی جارحیت بلاوجہ نہیں تھی۔ فرانس نے خفیہ طور پر آسٹریا سے معاہدہ کر لیا تھا جس کے تحت وینس کو آسٹریا کے حوالے کر دیا جائے گا۔ اور اس کے بدلے میں نیدرلینڈ میں آسٹریا کے زیر تسلط علاقے فرانس کو مل جائیں گے۔ اس کے بعد فرانس نے وینس میں اس معاہدے پر ریفرینڈم کروایا۔ وینس کے لوگوں نے آسٹریا کے راج کو فرانس پر ترجیح دی۔ جس کے بعد نپولین کی افواج نے وینس کو بری طرح لوٹا۔ نوادرات کو لوٹ کر فرانس لے جایا گیا۔ وینس کی بحری فوج کے جہاز یا تو چھین لئے گئے یا انہیں ڈبو دیا گیا۔ اور بڑے ہتھیار تباہ کر دئیے گئے۔ اس طرح اپنے زمانے میں یورپ کی طاقتور ترین بحری قوت ایک ذلت آمیز انجام کو پہنچی۔

جنوری 1798ء میں وینس، آسٹریا کے قبضے میں چلا گیا جس کے بعد فرانسیسی لوٹ مار کا خاتمہ ہوا۔ لیکن آسٹریا کا اقتدار زیادہ عرصے نہ رہ سکا۔ 1805ء میں فرانس نے پھر وینس کا انتظام سنبھال لیا۔ 1815ء میں وینس ایک بار پھر آسٹریا کے قبضے میں چلا گیا۔ آخرکار 1866ء میں وینس جدید متحدہ اٹلی کا حصہ بن گیا اور آج تک اٹلی کا حصہ ہے[11]۔

[1] سودا جو تیرا حال ہے ایسا تو نہیں وہ – کیا جانئے تو نے اسے کس آن میں دیکھا – مرزا رفیع سودؔا

[2] https://www.roughguides.com/italy/venice-veneto/

[3] آب در آب مرے ساتھ سفر کرتے ہیں - تشنہ لب خواب مرے ساتھ سفر کرتے ہیں – طارق قمر

[4] مسعود مرزا نیازی

[5] https://veneziaautentica.com/bridges-in-venice-italy/

[6] اختر سعید خان

[7] The Rough Guide to Venice & Veneto, 2019, 978-1-789-19414-2

[8] The Rough Guide to Venice & Veneto, 2019, 978-1-789-19414-2

[9] عبد العزیز فطرت

[10] Venice - History | Britannica

[11] https://en.wikipedia.org/wiki/Fall_of_the_Republic_of_Venice

British Desi's life

Search This Blog